საპარლამენტო უმრავლესობის წევრი ზაქარია ქუცნაშვილი უარყოფს, რომ პრეზიდენტსა და ყოფილ პრემიერს შორის დაპირისპირება გრძელდება და განმარტავს, რატომ არ მივიდა მთავრობა პარლამენტში პრეზიდენტის გამოსვლის დღეს, 2014 წლის თებერვალში.
ქუცნაშვილი ამბობს, რომ დაპირისპირება არაა არც მოქმედ პრემიერსა და პრეზიდენტს შორის და დაპირისპირების არარსებობის ერთ–ერთ მაგალითად მოჰყავს პრეზიდენტის საგარეო ვიზიტების უზრუნველყოფა, რომელიც მთავრობის მხარდაჭერით ხორციელდება და იგეგმება,– ამის შესახებ ზაქარია ქუცნაშვილმა ,,იმედის“ ეთერში, თეა სიჭინავას გადაცემაში განაცხადა.
,,მე ვფიქრობ, რომ ეს დაპირისპირება ამოწურულია, იმის შემდეგ არც ბიძინა ივანიშვილის განცხადება მომისმენია მარგველაშვილის წინააღმდეგ და არც მარგველაშვილის ივანიშვილის წინააღმდეგ.
ვფიქრობ, ეს თემა ამოწურულია და თემის გაზვიადება საჭირო არაა, გიორგი მარგველაშვილი, როგორც ქვეყნის პრეზიდენტი და მთავარსარდალი სრულ თანამშრომლობაშია არსებულ ხელისუფლებასთან, რა თქმა უნდა, სუსტი ადამიანები მნიშვნელობას ანიჭებენ ასეთ პიროვნულ საკითხებს, სახელმწიფოებრივად მოაზროვნეები პირად ურთიერთობას მნიშვნელობა სარ ანიჭებენ.
შემიძლია ვთქვა, რომ გიორგი მარგველაშვილი, როგორც მთავარსარდალი და ირაკლი ღარიბაშვილი თანამშრომლობენ პიროვნულადაც და ადმინისტრაციულ დონეზეც.“– განაცხადა ქუცნაშვილმა.
ქუცნაშვილმა განმარტა, რატომ არ მივიდა პრეზიდენტის გამოსვლისას მთავრობა პარლამენტში, ქუცნაშვილის თქმით, ამის მიზეზი ,,ნაციონალური მოძრაობა“ იყო: ,,მთავრობას ჰქონდა ასეთი პოზიცია, რომ ის ეჭვი, რომელსაც ნერგავდა „ნაციონალური მოძრაობა“ მერე იტყოდნენ, რომ მთავრობამ მოიყვანა მარგველაშვილი და ეს იფიქრა ჩვენმა მთავრობამ და ჩემი აზრით, ეს იყო შეცდომა, იმიტომ რომ ამათ შიშებზე და ჭორებზე არ უნდა ვიცხოვროთ.“