-
2014-04-29 21:37
დილის საათებში, ზანდუკელის ქუჩაზე მომხდარი ინციდენტის შემდეგ პოლიციამ 1993 წელს დაბადებული ერაყის მოქალაქე დააკავა, რომელსაც სექსუალური ხასიათის ძალმომრეობითი მოქმედება ედება ბრალად.
გამოძიებამ დაადგინა, რომ დაკავებულთაგან ერთმა თბილისში, ზანდუკელის ქუჩაზე, თავის დროებით საცხოვრებელ ბინაში არასრულწლოვანი ბიჭი მოტყუებით მიიყვანა, შემდეგ ძალის გამოყენებით მასთან სქესობრივი კონტაქტი დაამყარა და შემთხვევის ადგილიდან მიიმალა. მოგვიანებით დაზარალებულმა დახმარებისთვის პოლიციას მიმართა.
ამავე დროს, პოლიციის მობილიზება საჭირო გახდა ზანდუკელის ქუჩაზე, იმ ბინაში, სადაც უცხოელები ცხოვრობენ. ადგილობრივი მოსახლეობა ბინაში მცხოვრებ უცხო ქვეყნების მოქალაქეებს დაუპირისპირდა. ბინაში, სადაც 15 წლის მოზარდი გააუპატიურეს, ადგილობრივმა მოსახლეობამ მათ ფიზიკური და სიტყვიერი შეურაცხყოფა მიაყენა. სიტუაცია რამდენჯერმე დაიძაბა. რამდენიმე უცხოელი ერთ-ერთ ოთახში იყო შეკეტილი და მათ პოლიცია იცავდა. მოგვიანებით მათ სახლი დატოვეს.
დილით ზანდუკელის ქუჩაზე მომხდარი ინციდენტის შესახებ ინფორმაცია, თვითმხილველზე დაყრდნობით, „ინტერპრესნიუსმა“ გაავრცელა:
"დილის 8 საათი იქნებოდა, კარზე ბრახუნის ხმა გავიგეთ. გავაღეთ კარი, ატყდა წივილ-კივილი, იყო 15-16 წლის მოზარდი ბიჭი, თითქმის შიშველი, პირსახოცი ჰქონდა შემოხვეული და შველას ითხოვდა. რამდენიმე წუთში გაურკვეველი წარმომავლობის უცხოელიც მოვიდა და ბავშვის გაყვანას ითხოვდა, თუმცა არ გავატანეთ. რის შემდეგაც ერთ-ერთმა უცხოელმა ბავშვს ტანსაცმელი მიუტანა.
როგორც მოზარდმა გვითხრა, მისი გაუპატიურების მცდელობა იყო. მან თქვა, რომ სამი უცხოელი იყო და მოტყუებით გამოეპარა მათ. ჩვენ პატრული გამოვიძახეთ, საპატრულო პოლიციის მოსვლამდე ისინი გაიქცნენ". წინასწარი ინფოარმაციით, მოზარდმა განაცხადა, რომ „გლდანის გამანაწილებელში“ ცხოვრობდა და ის საპატრულო პოლიციამ წაიყვანა.