2014-04-29 14:29

ქართულ ბაზარზე ლუდის ახალი ბრენდი "ოქროს არწივი" გამოჩნდა. ბრენდი ლუდსახარშ "ზედაზენის", ქართული ლუდის კომპანიის პროდუქტია და მისი პრეზენტაცია დღეს ლუდსახარშ "ზედაზენში" გაიმართა.

"აფხაზეთის ხმა" გთავაზობთ "რკინაბეტონის შპალის ქარხნის" დირექტორის ილია შიხაშვილის სიტყვას, რომელიც მან "ოქროს არწივის" პრეზენტაციაზე წარმოთქვა. შეგახსენებთ, რომ "რკინაბეტონის შპალის ქარხანა" "ქართული ლუდის კომპანიის" დამფუძნებელი და ერთერთი მფლობელია:

"მოგესალმებით ყველას! მადლობას მოგახსენებთ მობრძანებისთვის!

ლუდის ყველა ჭეშმარიტ გურმანს და სრულიად საქართველოს მინდა მივულოცო უმაღლესი ხარისხის პრემიუმ ლუდის დაბადება და დარწმუნებული ვარ, რომ „ოქროს არწივს“ ქართველი მომხმარებელი პირველი დაგემოვნებისთანავე შეიყვარებს.

როგორც რიგითი ქართველი, მე დღეს ვარ ძალიან ბედნიერი, რომ საქართველოში შეიქმნა ისეთი პროდუქტი, რომლითაც იამაყებს ჩვენი საზოგადოების ნებისმიერი წევრი.

მოგახსენებთ რომ, მე ვხელმძღვანელობ „რკინაბეტონის შპალის ქარხანას“-იმ საწარმოს, რომელიც არის „ქართული ლუდის კომპანიის“ ერთ-ერთი დამფუძენებლი და სრული პასუხისმგებლობით მინდა განვაცხადო, რომ ლუდსახარშმა „ზედაზენმა“ სულ რაღაც ორიოდ წლის განმავლობაში, მიუხედავად უდიდესი სირთულეებისა, შეძლო გამხდარიყო ისეთი  წარმატებული ბრენდი, რომელიც წარმოაჩენს ჩვენს ქვეყანას, როგორც ადგილობრივ, ასევე საერთაშორისო ასპარეზზე. შეიძლება თამამად ითქვას, რომ ლუდსახარში „ზედაზენი“ იქცა გამარჯვებისა და წარმატების სიმბოლოდ.

მინდა მოგახსენოთ, რომ ჩვენმა ჯგუფმა შექმნა არაერთი წარმატებული საწარმო თუ ინოვაციური ქართული პროდუქტი; და მთელი ჩვენი გუნდი კვლავაც განაგრძობს ჩვენი ქვეყნის წინსვლისთვის მუხლჩაუხრელ შრომას.

გავაჟღერებ ერთ სასიამოვნო სიახლეს-რამოდენიმე დღის წინ ჩვენს საწარმოს მოეხსნა ყადაღა, რამაც საშუალება მოგვცა დაგვეწყო ზრუნვა განვითარებისთვის და ახალი პროდუქტების შექმნისთვის, და დღეიდან უკვე აქტიურად ვმუშაობთ ისეთი მნიშვნელოვან სიახლეების დანერგვაზე, რომელიც დღემდე არ განხორციელებულა ამიერკავკასიაში- ესაა ისრული გადამყვანების რკინაბეტონის ბრუსები და ახალი ტიპის რკინაბეტონის შპალების წარმოება, რომელიც განკუთვნილია დაბალრადიუსიანი მრუდებისთვის.

გარდა ამისა, ჯგუფის მასშტაბით მომზადებული გვაქვს რამდენიმე ძალიან საინტერესო პროექტი, რომელსაც უახლოეს პერიოდში განვახორციელებთ!

კიდევ ერთხელ უდიდეს მადლობას მოგახსენებთ მობრძანებისთვის!

ილია  შიხაშვილი, „რკინაბეტონის შპალის ქარხანის“  დირექტორი