2014-04-29 10:15

იაშვილის სახელობის კლინიკის პროფესორს პაატა გვეტაძეს, მას შემდეგ, რაც სამსახურში მივიდა, პაციენტის ბაბუა დაესხა თავს. ამის შესახებ ინფორმაციას კლინიკის პრესსამსახური ავრცელებს.

პრესსამსახურის ცნობით, თავდამსხმელმა ექიმს ფიზიკური და სიტყვიერი შეურაცხყოფა მიაყენა, ასევე, დააზიანა მისი კუთვნილი ავტომანქანა. 

"აფხაზეთის ხმის" ინფორმაციით, თავდასხმაში ეჭვმიტანილი იაშვილის სახელობის  კლინიკაში გარდაცვლილი წლინახევრის ბავშვის, დავით ვეფხვაძის ბაბუა იყო, რომელიც ექიმს ბავშვის გარდაცვალებაში ადანაშაულებს.

გარდაცვლილი ბავშვის ახლობლები არ ეთანხმებიან ექიმების განცხადებას იმის შესახებ, თითქოს ბავშვს თანდაყოლილი პათოლოგიური დაავადება ჰქონდა. მათ დღეს აქციაც გამართეს, სადაც ექიმებთან სიტყვიერი დაპირისპირებაც მოხდა. 

პაატა გვეტაძეს მრავლობითი ჭრილობები სახის მიდამოში და ტვინის შერყევა აღენიშნება.
ამ დროისთვის აღძრულია სისხლის სამართლის საქმე, მიმდინარეობს გამოძიება. თავდამსხმელი იძებნება.