2014-04-23 17:27

აღდგომის დღესასწაულზე ჩალაუბნის საპატრულო ეკიპაჟმა „ნაციონალური მოძრაობის“ დედოფლისწყაროს ორგანიზაციის თავმჯდომარის ლევან ბაღაშვილის ძმა დააკავა - პოლიციელებს ეჭვი გაუჩნდათ, რომ ის ნარკოტიკული ნივთიერების ზეგავლენის ქვეშ იმყოფებოდა.

სინამდვილეში კი, როგორც ლევან ბაღაშვილმა „აფხაზეთის ხმას“ უთხრა, ამით მას შეუსრულეს მუქარა, რომ „გაამწარებდნენ“ თუ პოლიტიკურ აქტივობაზე უარს არ იტყოდა.

მისივე თქმით, ძმა შაქრიანი დიაბეტითაა ავად და ექიმის მიერ დანიშნულ სხვადასხვა პრეპარატებს იღებდა, რომელთა ერთობლიობის გავლენით, შესაძლოა, შარდის ანალიზის დროს ნარკოტიკების რომელიმე ჯგუფის ცალკეული კომპონენტი აღმოჩენილიყო, რაც ასეც მოხდა, რის შემდეგაც დაკავებული წინასწარი დაკავების იზოლატორში გადაიყვანეს და იმის მიუხედავად, რომ მსგავსი შემთხვევების დროს დაკავებულ, წამალდამოკიდებულ პირებსაც კი სასამართლო პროცესამდე ხელწერილით ათავისუფლებენ, მის ძმასთან მიმართებაში წინასწარი დაკავების ვადა მაქსიმალურად გამოიყენეს:

„მანამდე მემუქრებოდნენ, რომ თუ პოლიტიკურ აქტივობას არ შევეშვებოდი, გამამწარებდნენ და, ეტყობა, ჩათვალეს, რომ ასე გამამწარეს“, - აცხადებს ლევან ბაღაშვილი.

ლევან ბაღაშვილის განცხადებით, სასამართლომ გაითვალისწინა, რომ მისი ძმა დიაბეტით იყო ავად, ამიტომაც, სამხარაულის სახელობის ექსპერტიზის ბიუროს ნარკოლგიური ექსპერტიზა დანიშნა და პროცესი პასუხის მიღებამდე - 2014 წლის 6 მაისამდე გადადო.

ლევან ბაღაშვილი „აფხაზეთის ხმასთან“ საუბარში ამბობს, რომ მისი ძმის გათავისუფლების შემდეგ, ოჯახი არ დაელოდა სამხარაულის ექსპერტიზის პასუხს და მისმა ძმამ ალტენატიული შემოწმება იგივე მეთოდით - შარდის ანალიზით გაიარა, რამაც დაადასტურა, რომ ის არ იყო წამალდამოკიდებული:

„6 მაისამდე სამხარაულის ბიუროს პასუხიც მოვა და სავარაუდოდ, სასამართლო სწორედ იმ დასკვნით იხელმძღვანელებს“, - ამბობს ლევან ბაღაშვილი.