,,მატროსოვის ციხის“ საკანში მყოფ ადვოკატ რომეო საჯაიას, გამომძიებელმა დავით ძნელაშვილმა შეურაცხყოფა მიაყენა.
როგორც საჯაიამ „Frontnews“–ს განუცხადა, იგი მისი დაცვის ქვეშ მყოფ ალეკო გორგაძეს ესაუბრებოდა, რა დროსაც მოულოდნელად კარი გამომძიებელმა დავით ძნელაშვილმა შეაღო, ყვირილი დაიწყო და შეურაცხყოფა მიაყენა.
„ადვოკატისა და მისი დაცვის ქვეშ მყოფი პირის საუბარი კონფიდენციალურია. ჯერ ერთი, ეს სულ სხვა საქმეა და არანაირი შემხებლობა არ აქვს გამომძიებელ ძნელაშვილს; მეორეც, მან უფლებამოსილებას გადაამეტა, როდესაც ოთახში შემოვიდა და დაცვის ქვეშ მყოფ პირთან საუბარში ხელი შემიშალა.
რაც შეეხება თავად ინციდენტს, ძნელაშვილი ოთახში შესვლისთანავე საქმის გარჩევას შეუდგა, თუ რა უფლებით ვუწოდებთ მას მწამებელს და ზოგადად რა კომენტარებს ვაკეთებთ. აღნიშნულის ნიადაგზე ორივე მხრიდან ადგილი ჰქონდა სიტყვიერი შეურაცხყოფის მიყენებას, შემდეგ კი კარი გაიხურა და გაიქცა.
არც ის ვიცი, საიდან გაიგო, პატიმარს რომ ვხვდებოდი და გარდა ამისა, ძნელაშვილს არანაირი უფლება არ ჰქონდა, ოთახში შემოსულიყო. მას აქვს დაუსჯელობის განცდა და იცის, რომ რაც არ უნდა ჩაიდინოს, ხელს არავინ ახლებს. იგივე გააკეთა ადრე გოგა ონიანთან მიმართებაშიც და ახლაც იგივე გაიმეორა“,– განაცხადა ადვოკატმა.
