2014-04-06 21:01

„ეგ რა არის, აბაშიძისა და შევარდნაძის ეპოქას დავუბრუნდით?“, - წერს „ფეისბუქის“ საკუთარ გვერდზე თურქეთში მცხოვრები ქართველი ფარნა-ბექა ჩილაშვილი და აცხადებს, რომ ბათუმში საქართველოს პასპორტის აღება 400 დოლარიანი ქრთამი ჯდება.

მისი თქმით, ასეთი ფაქტების საჯაროდ გამომზეურებისგან თავს იკავებს, თავისი თავი და ისტორიული სამშობლო რომ არ შეარცხვინოს, მაგრამ სიტუაცია საგანგაშო გახდა:

"ამ ბოლო დროინდელ საქართველოს ახალ მოქალაქებს პასპორტებს იოლად არ აძლევენ და ვისაც აძლევენ აქ – თურქეთში, ისე ცუდად ექცევიან, რომ კაცი ნანობს, რომ მოქალაქეობა სთხოვა საქართველოს. ამ ბოლო დროს კი, როგორც მეუბნებიან, საერთოდ არ იძლევება პასპორტები თურქეთში, საგარეო უწყებებში. მაგრამ თუ ბათუმში ჩახვალთ და 400 დოლარიან ქრთამს მისცემთ, იოლად იძლევენო. ეგ რა არის, აბაშიძესა და შევარდნაძის ეპოქას დავუბრუნდით?", - კითხულობს ჩილაშვილი (სტილი დაცულია).