2013-07-30 10:29

წყალდიდობის გამო სენაკში მოსახლეობის თვითნებური ევაკუაცია დაიწყო. სენაკის ცენტრი 70-ზე მეტმა ოჯახმა დატოვა, რომელთა საცხოვრებელი სახლების ეზოები და პირველი სართული დატბორილია.

გადაუღებელი წვიმის შედეგად სენაკს პრობლემები დღეს შეექმნა. დატბორილია ასეულობით სახლი, ქალაქის ცენტრი, თეატრი, სხვა დაწესებულებები, შეფერხებულია ავტომანქანების მოძრაობა ლესელიძე-სენაკი-თბილისის გზაზე, რამდენიმე ათეული მანქანა პარკირების ადგილიდან ნიაღვარმა გაიტაცა.

წყლის დონემ ზოგიერთ ადგილებში 50-60 სმ-ით, ზოგან კი ერთი მეტრითაც კი აიწია. დახოცილია შინაური ცხოველები და ფრინველები. მოსახლეობას შორის მსხვერპლის ან დაზიანების შესახებ ინფორმაცია არ გავრცელებულა. სენაკთან ერთად სამეგრელოს სხვა რაიონებიც დაზარალდნენ.

სამეგრელოში ამ დრომდე წვიმს.