სასამართლო-სამედიცინო ექსპერტი ლევან ჩაჩუა, რომელიც ყოფილი პრემიერმინისტრის, აწ გარდაცვლილი ზურაბ ჟვანიას ცხედრის ექსპერტიზაში მონაწილეობდა, "ინტერპრესნიუსთან" საუბარში ამბობს, რომ დღეს გავრცელებული ფოტოები ფალსიფიცირებულია.
მისი განმართებით, ჟვანიას ცხედარს ტუჩზე, მხოლოდ ერთი დაზიანება აღენიშნებოდა და სხვა დაზიანება ცხედარს არ ჰქონია.
"ჩვენ ვნახეთ მხოლოდ ტუჩის არეში არსებული დაზიანება და სხვა არაფერი. მეორე ცხედარს, რაულ უსუპოვს საერთოდ არავითარი დაზიანება არ ჰქონდა. შესაბამისად, ეს წერია დასკვნაში. მე არ ვიცი საიდანაა ეს კადრები. მე ვიცი, რომ ამ ყველაფერს ვიდეოზე იღებდა პროკურატურა და ვთხოვ, წარმოადგინონ ის ვიდეო, რომლითაც დადასტურდება, რომ აღნიშნული ერთი დაზიანების გარდა ჟვანიას ცხედარს სხვა დაზიანება არ ჰქონია", - განაცხადა ლევან ჩაჩუამ.
ექსპერტი ასევე ამბობს, რომ გავრცელებული ფოტოების ავთენტურობა ექსპერტიზამ უნდა დაადგინოს:
"უნდა ჩატარდეს ფოტოების ავთენტურობასთან დაკავშირებით ექსპერტიზა და მე ამის შესახებ აუცილებლად განვაცხადებ.
სრული პასუხისმგებლობით შემიძლია ვთქვა, რომ ესაა ფალსიფიცირებული კადრები", - აღნიშნა სასამართლო-სამედიცინო ექსპერტმა.
