საქართველოს ნაციონალური ბალეტის სამხატვრო ხელმძღვანელმა და ერთერთმა ხელმძღვანელმა ნინო სუხიშვილმა „სუხიშვილების“ მიერ რუსეთში 2013 წელს დაგეგმილი 22 კონცერტი გააუქმა.
მაშინ ის აცხადებდა, რომ ასე იმიტომ მოიქცა, რადგან ინტუიციას მიენდო, რომელსაც მისთვის არასდროს უღალატია: „მე ვთვლი, რომ დღეს ჩემი ქვეყნის ღირსების შესანარჩუნებლად რუსეთში საგასტროლოდ წასვლა ნაადრევია“, – ამბობდა ხელოვანი.
„შეიძლება ბევრმა გამამტყუნოს, მაგრამ ჯერ-ჯერობით არ მინდა რუსეთში წასვლა. 22 კონცერტი გავაუქმე. ფინანსურად ეს შესაძლოა დიდი შეცდომა იყო, მაგრამ მე ყოველთვის ინტუიციით ვმოქმედებ.
ინტუიციას აქამდე ჩემთვის არასდროს უღალატია. კიდევ ერთ რამ, რაც ძალიან მინდა შევინარჩუნო, ღირსებაა. მე ვთვლი, რომ დღეს ჩემი ქვეყნის ღირსების შესანარჩუნებლად რუსეთში საგასტროლოდ წასვლა ნაადრევია. ამიტომ მივიღე ეს გადაწყვეტილება.
ძნელი მისაღები კი ის იმიტომ იყო, რომ მოცეკვავეების ფინანსური მდგომარეობა არ არის კარგი, მათი ხელფასი საკმარისი არ არის და ისინი გასტროლების ხარჯზე არსებობენ. "შესაბამისად, ამ კონცერტზე უარის თქმა ძალიან სერიოზული ნაბიჯი იყო."- აცხადებდა ნინო სუხიშვილი 2013 წელს.
შეგახსენებთ, რომ ცოტა ხნის წინ "სუხიშვილების" კონცერტმა უკრაინის სხვადასხვა ქალაქში სრული ანშლაგით ჩაიარა. განსაკუთრებული მოწონება ხვდა წილად მათ მიერ "ხორუმის" შესრულების დროს სცენაზე უკრაინის სახელმწიფო დროშით გამოსვლას, რასაც დარბაზი ყველგან ფეხზე წამოდგომითა და აპლოდისმენტებით მიესალმა.
