2014-03-18 23:48

გადაცემაში "პოლიტიკის დრო", ტვ "იმედზე" ბიძინა ივანიშვილმა ვრცლად ისაუბრა საქართველოს პრეზიდენტთან მის უთანხმოებაზე და ხაზი გაუსვა, რომ არჩევნების შემდეგ გიორგი მარგველაშვილმა ხასიათის ბევრად სხვა თვისებები გამოავლინა.

"მოქალაქის" ლიდერი და ყოფილი პრემიერმინისტრი აცხადებს, რომ პრეზიდენტის ავლაბრის რეზიდენცია, პარლამენტის მიერ მიღებულ ერთერთ კანონზე ვეტოს დადების სურვილი და მიხეილ მაჭავარიანის ძმის, ვანო მაჭავარიანის გაფავორიტება ის მთავარი საკითხები იყო, რაზეც მარგველაშვილთან ხშირად უწევდა კამათი.

"არაფერი არანორმალური აქ არ ხდება, მაგრამ მე უკეთესს ველოდი. პირველი ორი თვის განმავლობაში მე მქონდა პოლემიკა უკვე არჩეულ პრეზიდენტთან, იყო გაუგებრობა, ჩვენ გვქონდა ჩაჭიდებული პოლემიკა, მან გამოავლინა ბევრი ისეთი ხასიათის თვისება არჩევნების შემდეგ, რაც მოულოდნელი იყო.

მან პასუხი ვერ გამცა ვანო მაჭავარიანთან დაკავშირებით: რატომ გახდა ახალი პრეზიდენტის ფავორიტი ვანო მაჭავარიანი, როცა მისი ძმა მიხეილ მაჭავარიანი არის ძველი პრეზიდენტის ფავორიტი.

თანაც, მას ამძიმებდა ის, რომ როცა ჩვენ პარტიას ვქმნიდით, გიორგიმ მოიყვანა ჩვენთან მისი მეგობარი, რომელიც ჩვენი წევრი უნდა გამხდარიყო, მაგრამ გამოვიდა, რომ ის იქ მოვიდა მხოლოდ იმიტომ, რომ "ნაციონალური მოძრაობა" შეეშინებინა, აი, იქ მივედიო.

მოვიდა იმიტომ, რომ მიეღო სამსახური - ის დაასაქმეს და მისცეს 7.000 ლარი და მერე დამირეკა საპარტნიორო ფონდიდან გილაურმა, ეს კაცი არ დადის სამსახურში, ხელფასის ასაღებადაც არ მოსულაო და შენ ხომ არ გჭირდებაო, და ამის შემდეგ გაათავისუფლა.

სანამ გიორგი კანდიდატი იყო, ყველაზე უარესი დამოკიდებულება პრეზიდენტის ადმინისტრაციისადმი ჰქონდა თავად მას ჰქონდა პრინციპული მოწინააღმდეგე. როცა მას დაუსვეს შეკითხვა, რატომ ხარ ასე აგრესიულიო, მან თქვა, როგორ შეიძლება მანდ გადასვლა, ეს არის გარყვნილების და უზნეობის სიმბოლოო, მაგრამ არჩევნების შემდეგ მას პრინციპულად განსხვავებული ხასიათი აღმოაჩნდა.

მე მახსოვს, სააკაშვილის მთავარი ოცნება იყო, რომ ეს სასახლე რამეფრად, არ დარჩენილიყო ფუნქციის გარეშე, მეუბნებოდა, რომ ფლიგელის მიშენებაც შეიძლებოდა მთავრობისთვის და ნახეთ ნაციონალების რეაქცია, მათ ეს ძალიანაც გაუხარდათ.

მე არ ვამბობ, რომ მას ვუკრძალავდით იქ შესვლას, მაგრამ ხაზს ვუსვამ, რომ მისი ხასიათი ასე მოკლე დროში კარდინალურად შეიცვალა. მას ძალიან ვაქებდი, ახლა სხვა მოსაზრებები გამოვთქვი, მაგრამ ვფიქრობ, ამას მარგინალიზება არ უნდა, თუმცა, მან ბევრი სიურპრიზი გვაჩვენა და მივიღე გარკვეული იმედგაცრუება.

დიახ, რასაკვირველია, ვეტოს დადების შესახებაც გვქონდა უთანხმოება და სხვა ბევრ რამეზეც, მე შევხვდი მას და ვუთხარი, რომ ვეტოს დადებას გაუგებრობა მოჰყვებოდა გუნდში და ამას ვერ გაუგებდნენ, რაზეც მივიღე პასუხი, რომ მას ეს არ აინტერესებს.

მაშინ ვუთხარი, რომ ხალხიც ვერ გაიგებდა ამას და ამაზეც ლამაზი სიტყვებით მითხრა, რომ ესეც არ აინტერესებს... მერე რა მოხდა, მე არ ვიცი, მე არ ჩავრეულვარ, ეტყობა, მან თავად მოიფიქრა და მიხვდა, რომ პარლამენტი პირველივე მცდელობით დაძლევდა მის ვეტოს და გადაიფიქრა", – განაცხადა ყოფილმა პრემიერმინისტრმა ბიძინა ივანიშვილმა ტელეკომპანია "იმედის" ეთერში.