2014-03-18 11:25

ნატოს მიერ საქართველოსთვის უკვე სექტემბერში მაპ–ის შესაძლო მინიჭების შესახებ გავრცელებული ინფორმაციის პარალელურად, ექსპერტები მსჯელობენ იმაზე, რომ ჯავახეთის სომხურ მოსახლეობაში ამან, შესაძლოა, პროტესტი გამოიწვიოს.

ამის მიზეზი, სავარაუდოდ, ის გახდება, თუკი ნატოში საქართველოს გაწევრიანების შემთხვევაში, საქართველოში თურქეთის ჯარი განთავსდება.

სომხეთის პარლამენტის წევრი, რესპუბლიკელი და „ჯავახკის“ ხელმძღვანელი შირაქ ტოროსიანი „პანორამა. ამ“–თან საუბარში აცხადებს, რომ სომხური სათვისტომოს მხრიდან საქართველოში სეპარატისტული გამოხტომები გამორიცხულია, მაგრამ არსებობს ერთი „მაგრამ“:

მისი თქმით, იქნება ეს ნატო თუ სხვა ორგანიზაცია, სტრუქტურა თუ მოვლენა, სომხურ ეთნოსში, იმის მიუხედავად, სად ცხოვრობენ ისინი, იწვევს თავდაცვის რეფლექსის გამომუშავებას: „ეს ჩვენს გენეტიკაშია ჩადებული“, – აცხადებს დეპუტატი.

„რასაკვირველია, საქართველოს აქვს თავისი ამოცანები და შეუძლია გახდეს ნატოს წევრი, მაგრამ არცერთ შემთხვევაში სომხური ეთნოსის წარმომადგენლები არ მოითმენენ იმ ადგილას თურქეთის ჯარის ყოფნას, სადაც თვითონ ცხოვრობენ, იმის მიუხედავად, რომელ ქვეყანას ეკუთვნის ეს ტერიტორია“, – აცხადებს დეპუტატი და დასძენს, რომ სომხური სეპარატიზმი მოსალოდნელი არ არის, მაგრამ თურქეთის ჯარის შემოყვანის შემთხვევაში სომხების სერიოზული აჯანყება გარდაუვალია.