2021-04-22 17:03

Pfizer -ისა და Moderna-ს კორონავირუსის საწინააღმდეგო ვაქცინები ორსულებისთვის სერიოზულ რისკს არ წარმოადგენს. ამის შესახებ CNN-ი New England Journal of Medicine-ში გამოქვეყნებულ კვლევაზე დაყრდნობით იტყობინება.

როგორც ისინი იტყობინებიან, კვლევის ავტორებმა 35 691 აცრილი ორსულის მონაცემები შეისწავლეს, რომელთა ასაკიც 16-დან 54 წლამდე მერყეობს. მათში რაიმე სერიოზული გვერდითი მოვლენა არ დაფიქსირებულა.

კვლევაში ასევე ორსულებს შორის გვერდითი მოვლენების შესახებაც არის ინფორმაცია. ყველაზე ხშირი გვერდითი მოვლენა ინექციის ადგილის ტკივილია. ამას კი თავისა და სახსრების ტკივილი და ცხელების შემთხვევები მოჰყვება.

ორსულები COVID-19-ის რისკ-ჯგუფად ითვლებიან. კვლევის ავტორები აცხადებენ, რომ ვაქცინაციის სარგებელი მის შესაძლო რისკს აღემატება. მანამდე რამდენიმე კვლევამ დაამტკიცა, რომ ორსულობისას აცრილიების შვილებს კორონავირუსისადმი თანდაყოლილი ანტისხეულები აქვთ.