2020-04-18 16:41

ალავერდის მონასტერში აღდგომის დღესასწაულისთვის ემზადებიან. ტაძრის მიმდებარედ დამონტაჟებულია ხმოვანი აპარატურა და თეთრი საღებავით მონიშნულია ადგილები, სადაც მრევლი განთავსდება.

ამასთან, როგორც ჟურნალისტებს მეუფე დავითმა დიდი შაბათის წირვის დასრულების შემდეგ განუცხადა, ღამისთეცაზე მისულ მოსახლეობას რეკომენდაციების გათვალისწინებით, თერმოსკრინინგით შეამოწმებენ და სადეზინფექციო ხსნარებს დაურიგებენ.

"ველოდებით მრევლს, იმიტომ, რომ დიდი დღესასწაულია. უბრალოდ, არ ვაზუსტებ ბევრი იქნება თუ ცოტა. ერთი რამის დაზუსტება შეგვიძლია - სადაც ორი ან ორზე მეტი შეიკრიბება ქრისტეს სახელით, იქ არის თავად ქრისტე და სამი მომლოცველიც რომ იყოს, იქ იქნება ქრისტე. ესე იგი, კარგი დღესასწაული გვექნება. ასე რომ, ველოდებით მრევლს.

რაც შეეხება შეზღუდვებს და მოთხოვნებს, დაწესების დღიდან ჩვენც, ეს დალოცვილი მონასტერი ვითვალისწინებთ რეკომენდაციებს. მთელი მონასტრის ტერიტორია მონიშნულია და ღამისთევას დავიწყებთ ღამით. გვექნება ლიტანიობა, ღვთის მადლით და შეწევნით მონასტერი მოწესრიგებულია.

გარდა ამისა, ადგილობრივ ხელმძღვანელობას ვთხოვეთ, რომ ამ მნიშვნელოვანი დღესასწაულის დროს მათი მხრიდან ყოფილიყო დახმარება და შეწევნა, კერძოდ, ყოფილიყო პოლიციის ეკიპაჟი იმ შემთხვევაში, თუ იქნება ხალხის სიმრავლე. ასევე თუ იქნება საშუალება თერმოსკრინინგით შემოწმება მოხდეს ხალხის, რადგან ამ ბოლო დროს

ვრცელდება მიზანმიმართული, შეურაცხმყოფელი გამონათქვამები, რომ ეკლესია არ იცავს წესებს, თუმცა ჩვენ ვცდილობთ, რომ გვერდში დავუდგეთ ერს, მრევლს, მთავრობას, როგორც შეგვიძლია. ჩვენთვისაც მოულოდნელი იყო ასეთი საგანგებო მდგომარეობა, სამხედრო წესით არ გვიცხოვრია და ამიტომ ასეთი ფეხაწყობით და მარშირების ნაბიჯით ვერ ვაკეთებთ ყველაფერს, თუმცა მონდომებას არ ვაკლებთ, ჩვენი ერიც და მრევლიც კეთილგანწყობილია, გონიერია და რასაც ვეუბნებით, ცდილობს გააკეთოს. ასევე მინდა მადლიერებით ვთქვა, რომ კომპანია „სეზანმა“ დაამზადა ე.წ ფარები, რომლებიც გადმოგვცა, ჩვენ კი დავარიგებთ. ასევე კომპანია „ბადაგონმა“ სადენზინფექციო სითხე დაამზადა და დღეს ყველა მომსვლეს დავურიგებთ,“ - განაცხადა მეუფე დავითმა.