2020-04-18 13:54

ქვემო ქართლის სახელმწიფო რწმუნებულის, შოთა რეხვიაშვილის განცხადებით, ბოლნისში კორონავირუსით ინფიცირების ორი ახალი შემთხვევა დაფიქსირდა, კიდევ 30 ადამიანის ტესტის პასუხს კი ელოდებიან.

როგორც რწმუნებულმა განაცხადა, იმედი აქვს, რომ გატარებული ღონისძიებების შედეგად, დადასტურებული შემთხვევების რაოდენობა დაიკლებს.

„ბოლნისში პირველი შეზღუდვა, სადაც ჩაიკეტა თემში შემავალი სოფლები, იყო ქვემო ბოლნისში და გაამართლა ამ შეზღუდვამ. იქ იყო 6 დადასტურებული შემთხვევა და შევინარჩუნეთ ეს სტატისტიკა და ზრდა არ გვაქვს. შემდეგ სავანეთი ჩავკეტეთ იმიტომ, რომ იქაც იყო გავრცელების მაღალი რისკები და იქაც, პრაქტიკულად, ვინარჩუნებთ სიტუაციას და გუშინწინ კაზრეთი და ბალიჭები ჩავკეტეთ იმიტომ, რომ უკვე ველოდით ბოლნისის ადმინისტრაციული ცენტრიდან გავრცელებას.

გაჩნდა შიდა გავრცელების ახალი კერები, მათ შორის, ცნობილია, რომ სასწრაფო სამედიცინო ბრიგადის ექიმები და ექთნები დაინფიცირდნენ, აქედან გამომდინარე, მოგვიწია დამატებითი შეზღუდვების გატარება და გუშინ ჩვენ ჩავკეტეთ ბოლნისის ადმინისტრაციული ცენტრი და რაჭისუბანი.

გუშინ იყო შიდაგავრცელების ნახტომისებური ზრდა, პრაქტიკულად, 19 დადასტურებული ფაქტი დაფიქსირდა. კონტაქტების მოძიება გრძელდება და გადაგზავნილია 30 საკვლევი მასალა ლაბორატორიაში და დღეს დღის განმავლობაში ჩვენ გვეცოდინება პასუხები,“- განაცხადა შოთა რეხვიაშვილმა.

ამასთანავე, მან რუსთავსა და მარნეულში არსებული ვითარებაც შეაფასა და განაცხადა, რომ რუსთავში დაინფიცირებულთა რაოდენობას 8 ადამიანისთვის არ გადაუჭარბებია.

„რუსთავში იყო ეროვნული ბანკის კლასტერი ორი ოჯახი და რეალურად 8 დადასტურებული ფაქტი გვქონდა. მას მერე გავიდა, დაახლოებით, 2 კვირა და რუსთავში ზრდა არ გვაქვს, საბედნიეროდ და ეს ადამიანებიც, სავარაუდოდ, დღე-დღეზე უკვე გამოჯანმრთელებულები გაეწერებიან.

მარნეულშიც იყო და არის შეზღუდვები და ძალიან კარგად იმუშავა ინდივიდუალური ტრანსპორტის შეზღუდვამ მთლიანად მხარეში. ოჯახებშია ხალხი, გადაუდებელი საჭიროების გარდა არ გამოდიან გარეთ, იცავენ რეგულაციებს და ეს არის უპირველესი გარანტი, რომ ჩვენ შევაჩერებთ შიდა გავრცელებას,“ - განაცხადა შოთა რეხვიაშვილმა.