2020-04-14 15:46

საქართველოს ეროვნული ბიბლიოთეკის დირექტორის, გიორგი კეკელიძის ინფორმაციით, ეროვნული ბიბლიოთეკის საგამოფენო სივრცეში სისხლის ბანკის თანამშრომლები დონორებს მიიღებენ.

კეკელიძის ინფორმაციით, დონორობის მსურველებს სისხლის ჩაბარება ხუთშაბათს 11:00-დან 14:00 საათამდე შეეძლებათ.

„კოვიდ-ინფექციას, ცხადია, სხვა არანაკლებ რთული ანდაც კიდევ უფრო რთული ავადმყოფებები არ გაუუქმებია. ბოლო თვეა, გასაგები მიზეზის გამო, იკლო სისხლის დონორთა რიცხვმა. ეროვნული ბიბლიოთეკა კვლავაც მზად არის საკუთარი სივრცე დაუთმოს ამ უმნიშვნელოვანეს პროცედურას:

ხუთშაბათს 11:00- 14:00 საათამდე სისხლის ბანკის თანამშრომლები დონორობის ყველა მსურველს ეროვნულ ბიბლიოთეკის საგამოფენო დარბაზში მიიღებენ - გუდიაშვილის #7.

ქვეყანაში შექმნილი ვითარებიდან გამომდინარე, ახლა განსაკუთრებით გვჭირდება თანადგომა. ძალიან ბევრი პაციენტია, ვისთვისაც სისხლის გადასხმა სასიცოცხლოდ მნიშვნელოვანია!

სისხლის გაცემა უსაფრთხო და სასარგებლო პროცედურაა. აქციაზე დაცული იქნება უსაფრთხოების ნორმები. წესები:

ყველა მსურველს ვთხოვთ ეკეთოს ნიღაბი;

პროცედურამდე და პროცედურის შემდეგ ჩაგიტარდებათ ხელების დეზინფექცია;

მოხდება თერმო სკრინინგი, ჩატარდება კონსულტაცია ექიმ-თერაპევტთან და წინასწარი ლაბორატორიული კვლევა;

სამედიცინო პერსონალი აღჭურვილი იქნება სპეც-სამოსით;

ჩასაბარებლად მოსულებმა უნდა დაიცვან სოციალური დისტანცია.

ძირითადი მოთხოვნები:

1. არ უნდა იყოთ გაციებული, არ უნდა გქონდეთ სიცხე, ყელის ტკივილი;
2. არ უნდა გქოდეთ ქრონიკული დაავადებები - ჩიყვი, დიაბეტი და ა.შ
3. გულ-სისხლძარღვთა დაავადებები;
4. გადამდები ინფექციები.

დამატებითი შეკითხვისთვის დარეკეთ

ცხელი ხაზი: 599352030”, - წერს კეკელიძე სოციალურ ქსელში.