2014-03-05 10:28

ყირიმს ბაიკერთა კლუბ "Ночные волки"–ს („ღამის მგლები") ლიდერი, ალექსანდრ ზალდოსტანოვი ეწვია, ეს უკანასკნელი ცნობილია მეტსახელით „ქირურგი“.

ზალდოსტანოვი ყირიმის მოსახლეობას დაჰპირდა, რომ მომავალ კვირას ნახვარკუნძულს სხვა ბაიკერებიც ესტუმრებიან. ისინი უკრაინელებს ტანსაცმელსა და წამლებს ჩაუტანენ.

ამასთანავე, კიდევ ერთი მასშტაბური აქცია ჩატარდება მოსკოვში კვირა საღამოს. აქციის ლოზუნგი იქნება: „უკრაინის მხარდაჭერა, კიევის ძალაუფლების ხელში ჩამგდებთა წინააღმდეგ“.

აქცია ადგილობივი დროით 17:00 საათზე დაიწყება. აქციის მონაწილეები პუშკინის მოედნიდან სახაროვის გამზირამდე მსვლელობას მოაწყობენ. ამის შესახებ ტელეკომპანია „როსია 24“ იუწყება. 

„Ночные волки“ ცნობილია, როგორც რუსეთში ჯერ კიდევ სსრ კავშირის არსებობის დროს, 80–იანი წლების ბოლოს აღმოცენებული ბაიკერების ჯგუფი, რომლებიც თავიანთ თავს არა ბაიკერებს, არამედ „რუს მოტოციკლისტებს“ უწოდებენ. ამ ჯგუფთან რუსეთსა და უკრაინაში არაერთი კრიმინალური ფაქტია დაკავშირებული, ზოგიერთი რუსული მედიასაშუალება კი მათ პირდაპირ „კრიმინალებად“ და „ქილერებად“ მოიხსენიებს.

ცნობილია ასევე, რომ „Ночные волки“ ვლადიმირ პუტინთან დაახლოებული დაჯგუფებაა. ისინი თავიანთ თავს რუსეთის ისტორიისა და ტრადიციების დამცველებად მიიჩნევენ და თვლიან, რომ მათი ერთობა მართლმადიდებლობის პრინციპებს ეფუძნება, თუმცა, მაგალითად კიევში ყოფნისას მათი მხრიდან მკერდშიშველი ქალების შემოსმამ მოტოციკლებზე ორთოდოქსი მრევლის განრისხება გამოიწვია.

„Ночные волки“ სვეტიცხოვლობის დღესასწაულზე, შარშან, საქართველოშიც იმყოფებოდნენ. მათმა ლიდერმა განაცხადა, რომ საქართველოში მიწვევა მათ კიევში საქართველოს პატრიარქის ვიზიტის დროს, საპატრიარქოსგან მიიღეს, თუმცა, საქართველოს საპატრიარქომ ეს ინფორმაცია უარყო და განაცხადა, რომ რუსი ბაიკერების ჯგუფი საქართველოში ოფიციალურად არ მოუწვევიათ.