2014-03-04 17:24

ქერჩის რადიოს ცნობით, იმ რუსმა სამხედროებმა, რომლებიც გუშინ ყუბანის მხრიდან, საბორნე გადასასვლელით შემოიჭრნენ უკრაინაში და შეიარაღებულები იყვნენ, იმავე გზით დატოვეს ქვეყანა.

გუშინ, როცა უკრაინელმა მესაზღვრეებმა ბორანი შეამოწმეს, აღმოაჩინეს, რომ ერთერთ მიკროავტობუსში შეიარაღებული პირები ისხდნენ: მათ ავტომატები და პისტოლეტები ჰქონდათ თან, ხოლო უკრაინაში იარაღით შესვლის უფლება, რაც წერილობით მოსთხოვეს მესაზღვრეებმა, ვერ წარადგინეს.

ამის შემდეგ ისინი სასაზღვრო პუნქტში შეიჭრნენ და იქ განთავსდნენ, დილის საათებიდან კი საბორნე გადასასვლელით უკრაინა დატოვეს.

„რუსი ჯარისკაცები მხოლოდ იღიმებოდნენ, როცა ადგილობრივები ვეკითხებოდით, რას აკეთებდნენ აქ, ერთ-ერთმა სამხედრო პირმა კი გვიპასუხა: „თქვენ გიცავდით და უკვე დავიღალეთ, ამიტომ მივდივართ“, - უთხრა ქერჩის რადიოს ერთმა ადგილობრივმა მცხოვრებმა.