რუსული მედიაჯგუფი РБК იტყობინება, რომ უკრაინის უფლებამოსილებაშეჩერებული პრეზიდენტი ვიქტორ იანუკოვიჩი მოსკოვის სიახლოვეს მდებარე ერთერთ სანატორიუმში იმყოფება.
გამოცემის ინფორმაციით, ასევე მოსკოვშია უკრაინის ყოფილი გენპროკურორი ვიქტორ ფშონკა.
РБК ინფორმაციას ერთერთ მსხვილ რუს მეწარმეზე დაყრდნობით ავრცელებს და წერს, რომ მოსკოვში იანუკოვიჩი სამშაბათს, ღამით ჩავიდა, რის შემდეგაც ის დაცვამ და თანმხლებმა პირებმა ყოფილ სასტუმრო „უკრაინაში“ მიიყვანეს.
წყაროს თქმით, მე-11 სართულზე მდებარე ბარ-რესტორანში მთელი ღამის განმავლობაში იანუკოვიჩის თანმხლები პირები იმყოფებოდნენ, ხოლო თავად იანუკოვიჩი სასტუმროში დიდხანს არ დაყოვნებულა და მოსკოვთან ახლოს მდებარე სანატორიუმ „ბარვიხაში“ წავიდა, სადაც ამ დრომდე იმყოფება.
РБК წერს, რომ ინფორმაციის გადამოწმება სანატორიუმის ხელმძღვანელობასთან სცადა, სადაც განუცხადეს, რომ ასეთი პირი მათთან არ დარეგისტრირებულა, ხოლო რუსეთის საგარეო საქმეთა სამინისტროში, შესაბამისი შეკითხვის დასმის შემდეგ გამოცემის ჟურნალისტს უპასუხეს, რომ საგარეო უწყება საგარეო საკითხებითაა დაკავებული და არა ცალკეული მოქალაქეების ადგილსამყოფელის დადგენით.
ამასთან, უკრაინული მედიის ცნობით, ვიქტორ იანუკოვიჩზე უკვე საერთაშორისო ძებნა გამოცხადდა.
