2014-02-25 22:53

„სპრავედლივაია როსიას“ ლიდერი აცხადებს, რომ უკრაინის „ბერკუტის“ წევრები რუსეთის შსს-ში უნდა დაასაქმონ. - ამის შესახებ „რია ნოვოსტი“ იუწყება.

მირონოვის განცხადებით, „იანუკოვიჩმა უღალატა საკუთარ ხალხს, როცა თავისი სასახლის ფანჯრებიდან ადევნებდა თვალს, როგორ კლავდნენ პირტიტველა ახალგაზრდა ბერკუტელებს და არანაირი ზომები არ მიიღო“.

მირონოვის თქმით, ყველამ ნახა კადრები, სადაც „ის ფაშისტები, რომლებიც ახლა ხელისუფლებისკენ მიილტვიან, როგორ დაუნდობლად კლავდნენ 17-18 წლის სპეცრაზმელებს“.

სერგეი მირონოვმა ასევე განაცხადა, რომ საჭიროა არამარტო უკრაინაში მცხოვრებ რუსებს, უკრაინელებსაც მიეცეთ საშუალება, სურვილის შემთხვევაში გახდნენ რუსეთის მოქალაქეები: „პასპორტები ყველაზე უნდა გავცეთ, მხოლოდ რუსებით არ შემოვიფარგლოთ“, - თქვა მან.

შეგახსენებთ, რომ უკრაინაში, არსებული მონაცემებით, 7 მილიონზე მეტი რუსი ეროვნების პირი ცხოვრობს.

სერგეი მირონოვი ასევე აუცილებლად მიიჩნევს, სპეცსამსახურებისა და შსს-ს ხელმძღვანელთა მონაწილეობით ჩატარდეს დუმის დახურული სხდომა, „რათა გავიგოთ, რა ელის სლავურ სამყაროს იმ სიტუაციაში, რომელიც ახლაა შექმნილი. არაა საჭირო სირაქლემის პოზიციის დაკავება, თამამად უნდა დავიცვათ ჩვენი ეროვნული ინტერესები“, - განაცხადა მირონოვმა. ის ვარაუდობს, რომ უკრაინაში ბერკუტელების მასობრივი დევნა დაიწყება.

შეგახსენებთ, რომ მირონოვის განცხადებამდე ცოტა ხნით ადრე არხანგელსკის ოლქის გუბერნატორმა განაცხადა, რომ მზადაა, „ბერკუტის“ წევრებს პოლიტიკური თავშესაფარი მისცეს.