2019-02-18 17:37

საერთაშორისო ინვესტორები პოლიტიკურ ნეიტრალიტეტს არღვევენ - „თიბისი ბანკის“ გარშემო დაწყებულ გამოძიებას საერთაშორისო სავაჭრო პალატაში პირდაპირ „ქართული ოცნების“ თავმჯდომარეს და ქვეყნის არაფორმალურ მმართველს უკავშირებენ.

პალატის სახელით დღეს განცხადება ფადი ასლიმ გააკეთა. მისი თქმით, წამყვან ქართულ ბანკში დაწყებული გამოძიების რეალური სამიზნე ანაკლიის პორტია, რომლის ხელში ჩაგდების სურვილიც სწორედ ბიძინა ივანიშვილს აქვს.

„ბატონ ბიძინა ივანიშვილს სურს, ხელში ჩაიგდოს "თიბისი ბანკი" და ანაკლიის პორტი. "თიბისი"-სთან დაკავშირებით ამის გაკეთებას ბანკის ყიდვით კი არ  აპირებს, არამედ ხელმძღვანელისა და მისი მოადგილის გადაყენებით. შემდეგი ნაბიჯი იქნება მენეჯმენტის ჩანაცვლება მასთან დაახლოებული ხალხით, ამისთვის გამოიყენებს ეროვნულ ბანკს. იმ ინფორმაციის საფუძველზე, რომელიც გვაქვს, ივანიშვილის მიზანია, დაეხმაროს რუსულ კომპანიებს, თავი აარიდონ სანქციებს. დაზვერვის გაერთიანება, მთელი მსოფლიოს მასშტაბით, უკვე ინფორმირებულია ბიძინა ივანიშვილის გეგმების შესახებ. ეს საშიში თამაშია და საქართველოს რეპუტაციას შელახავს,“ - ამბობს ფადი ასლი.

ფადი ასლი ასევე, ყურადღებას ამახვილებს ანაკლიის პორტზე და მასთან დაკავშირებით ივანიშვილის სამომავლო გეგმებზე.