2014-02-22 11:44

საქართველოს ყოფილმა პრემიერმინისტრმა, პატიმრობაში მყოფმა ვანო მერაბიშვილმა 21 თებერვალს საქალაქო სასამართლოს სხდომაზე განაცხადა, რომ სასამართლო სისტემის რეფორმირება ვერ იქცა მათი ხელისუფლების პრიორიტეტად, რასაც ახლა ის და მისი მეგობრები იმკიან კიდეც.

მისივე თქმით, სასამართლო პროცესების სახით „სპექტაკლში მონაწილეობას“ მხოლოდ იმისთვის დათანხმდა, რომ ოჯახის წევრებთან და მეგობრებთან შეხვედრის საშუალება ჰქონოდა და ბოდიში მოუხადა მშობლებსა და შვილებს, რომლებისთვისაც ის „უმადური შვილი და ეგოისტი მამა“ აღმოჩნდა:

„ამ სპექტაკლში ამ როლის თამაშს დავთანხმდი ერთი მიზეზით, რომ სასამართლო პროცესებზე ჩემი ოჯახის წევრებთან, ახლობლებთან, მეგობრებთან შეხვედრის საშუალება მქონოდა. რა თქმა უნდა, ჩვენ ბევრი რამე ვერ გავაკეთეთ და, რა თქმა უნდა, ერთერთი ყველაზე დიდი შეცდომა ჩვენ ის დავუშვით, რომ სათანადო ყურადღება ვერ მივაქცეთ სასამართლოს რეფორმირებას.

ჩვენ ხშირად ვსაუბრობდით ამ თემაზე და მთავარ პრიორიტეტად სამწუხაროდ, სასამართლო რეფორმა ჩვენთვის არ იქცა. სწორედ ამ შეცდომის მსხვერპლი ვართ მეც და ჩემი მეგობრებიც. მე მინდა მოვუხადო ბოდიში ჩემს მშობლებს, რომ აღმოვჩნდი უმადური შვილი და ჩემს შვილებს იმისთვის, რომ ვარ ეგოისტი მამა.

არც ადრე და არც დღეს, მე არაფერი არ გავაკეთე იმისათვის, რომ ჩემი მშობლებს ჰქონოდათ ტკბილი მოხუცობა და ჩემს შვილებს საშუალება - მამასთან გაზრდილიყვნენ. დანარჩენ შემთხვევაში, მე ვარ ძალიან ბედნიერი, რადგან მქონდა ყველაზე უფრო საინტერესო ცხოვრება, რაც შეიძლება ადამიანს საქართველოში ჰქონოდა.

მე ვარ ბედნიერი, რომ ვიყავი პირველ რიგებში ამ ბრძოლებში და მე დღეს რომ ვიყო თავისუფალი, ვიქნებოდი უბედური, იმიტომ რომ ჩემი მეგობრები, თანამებრძოლები სხედან ციხეში ან განიცდიან ზეწოლას. რა არის იმაზე უფრო სანატრელი, რომ მე ვიქნები და ვარ უკვე პატიმარი პუტინის და მისი ოლიგარქის ივანიშვილის“, – ამ განცხადების შემდეგ ვანო მერაბიშვილმა პროტესტის ნიშნად სასამართლოს სხდომა დატოვა.