„ტერიტორიული მთლიანობა არის დარღვეული რუსეთის საოკუპაციო ჯარების მიერ და ახლა რომელიმე ფილმში რას იტყვის რეჟისორი, ამაზე შეიძლება ჩვენი პროტესტი გავაგზავნოთ, მაგრამ ამით რეალობა არ იცვლება სამწუხაროდ“,
-ასე გამოეხმაურა "საზოგადოებრივ მაუწყებელთან" ლტოლვილთა და განსახლების მინისტრი, სოზარ სუბარი ამერიკელი რეჟისორის, ოლივერ სტოუნის ფილმს „პუტინი“, სადაც საქართველოს რუკა დამახინჯებულად არაერთხელ არის წარმოდგენილი.
„საზოგადოებრივთან“ საუბრისას სოზარ სუბარი აღნიშნავს, რომ საქართველოს ტერიტორიული მთლიანობის დარღვევის ფაქტის გასაპროტესტებლად საჭიროა სხვა ქმედითი ნაბიჯების გადადგმა, ვიდრე უბრალოდ შეშფოთების გამოხატვა.
„ამ რეალობას სჭირდება დემოკრატიის განვითარება, ეკონომიკის გაძლიერება და მუდმივი მუშაობა ჩვენს მხარდამჭერებთან, რომ ერთ მშვენიერ დღეს აღდგეს ტერიტორიული მთლიანობა და მე აბსოლუტურად დარწმუნებული ვარ, რომ ეს დღე დადგება“, -განაცხადა სუბარმა.
რაც შეეხება შეკითხვას, რა შეფასებას მისცემს ფაქტს საქართველოს ხელისუფლება, სუბარი ამბობს, რომ რეაქცია იქნება.
„ცხადია, რაღაც რეაქცია გვექნება, მაგრამ რეჟისორმა რაც გადაწყვიტა, თვითონ თქვა, მე ამ ყველაფერს ვაკეთებდი იმიტომ, რომ პუტინი არ გამეღიზიანებინა და მწვავე კითხვებს არ ვუსვამდი იმიტომ, რომ მაშინ არ დამელაპარაკებოდაო და რას ვიზამთ ახლა?!",-განაცხადა სუბარმა.
მინისტრმა ამერიკელი რეჟისორის ფილმიც შეაფასა და მას პანეგირიკი უწოდა: "ზოგადად ოლივერ სტოუნის ფილმმა გამოიწვია მძაფრი კრიტიკა არამხოლოდ საქართველოში, არამედ მთელ მსოფლიოში. ეს გარკვეულ პანეგირიკად იქნა აღქმული პუტინის მიმართ. მე არა მაქვს ნანახი და ვერ ვიტყვი, არის თუ არა ეს პანეგირიკი, თუმცა ვეთანხმები იმ შეფასებებს რაც ითქვა და სავარაუდოდ ასეა, სხვანაირად არ ითქმებოდა“, - აღნიშნა სუბარმა.
"საზოგადოებრივმა" კომენტარი დღეს საგარეო საქმეთა მინისტრს, მიხეილ ჯანელიძესაც სთხოვა, თუმცა მან თემაზე საუბარი არ ისურვა.