უკრაინის რადამ მიიღო გადაწყვეტილება, რომელსაც მხარი მმართველი პარტიის „რეგიონების“ 34 დეპუტატმაც დაუჭირა.
მიღებულია მნიშვნელოვანი გადაწყვეტილებები, რომელთაგან პირველ რიგში, აღსანიშნავია რადას გადაწყვეტილება ძალოვნებთან მიმართბეში: ისინი ყაზარმებში უნდა დაბრუნდნენ, ხოლო კიევის ცენტრში მიმდინარე „ანტიტერორისტული ოპერაცია“ უნდა შეწყდეს.
ამასთან, რადას გადაწყვეტიელბით, იკრძალება ცეცხლსასროლი იარაღის გამოყენება ხალხის წინააღმდეგ, უნდა დაიწყოს გამოძიება დაღუპულთა საქმის დეტალებზე და უნდა გამოვლინდნენ დამნაშავეები, სახელმწიფომ უნდა უზრუნველყოს დაღუპულთა ოჯახებისა და დაშავებულთა ფინანსური დახმარება, დაკავებული აქტივისტები დაუყოვნებლივ უნდა გათავისუფლდნენ და მიეცეთ თავისუფალი გამოხატვის ნება, უნდა მოიხსნას სატრანსპორტო ბლოკადა.
მნიშვნელოვანი გადაწყვეტილება მიიღო რადამ ასევე საგანგებო მდგომარეობის გამოცხადებასთან დაკავშირებით – ამის უფლება მხოლო რადას ექნება.
ამას გარდა, მიღებულია გადაწყვეტილება, რომ 21 თებერვლიდან რადა ყოველდღე ჩაატარებს სხდომებს დილის 10 საათიდან.
შეგახსენებთ, რომ უკრაინის პრეზიდენტსა და ოპოზიციის ლიდერებს შორის მოლაპარაკება კიევში ექვსი საათის წინ დაიწყო და შეთანხმება ჯერ მიღწეული არ არის. დილიდან სიმშვიდეა კიევის ევრომაიდანზე, სადაც აქტივისტების დიდმა ნაწილმა ღამე გაათია.
