საქართველოს ყოფილი პრემიერმინისტრი, მილიარდერი ბიძინა ივანიშვილი 13 აგვისტოს შეკვეთილში, "ბლექ სი არენაზე" ანსამბლ "ერისიონის" კონცერტს დაესწრო და ჟურნალისტებს უთხრა, რომ პოლიტიკური ხასიათის შეკითხვებს არ უპასუხებს.
მან "ერისონის" შექმნის წინაისტორია გაიხსენა, როცა "ქართული ხმების" წარმომადგენელს იდეა მიაწოდა, ქართული ცეკვა და სიმღერა ერთად წარმოედგინათ საფრანგეთში.
ივანიშვილის თქმით, მაშინ მისმა მეგობარმა "ქართული ხმებიდან" რობერტ გოგოლაშვილმა უპასუხა, რომ ქართული სიმღერა და ცეკვა განსხვავებული, ცალ-ცალკე ფენომენია და მათი შერწყმა არ იყო საჭირო:
"ამ ამბიდან ორი-სამი წელიც არ იყო გასული, რომ ფრანგებმა შესთავაზეს "ერისიონს"... ძალიან მიყვარს "ერისიონი", ალბათ, თქვენც ტკბებით და მოგწონთ ძალიან", - უთხრა ყოფილმა პრემიერმა ჟურნალისტებს, ხოლო ერთ-ერთი ჟურნალისტის მცდელობაზე, შეკითხვა დაესვა ქვეყანაში მიმდინარე პროცესებზე, განაცხადა: "პოლიტიკა არა! პოლიტიკა არა! მე მგონი, გავერთოთ და დავისვენოთ..."
