„ფეისბუქზე“ კამათი და აზრთა სხვადასხვაობა გამოიწვია მედიაექსპერტ ია ანთაძის სტატუსმა, სადაც ის წერს, რომ ენმ-ს მხარდამჭერები „ფეისბუქზე“ ხელისუფლებაში მიხეილ სააკაშვილის დაბრუნებით იმუქრებიან, ხოლო 21-ე საუკუნის პოლიტიკოსი არ შეიძლება, პატიოსანი ადამიანებისთვის საშიში იყოს.
„ოცდამეერთე საუკუნის ნორმალური პოლიტიკური ლიდერი არ შეიძლება, რომ პატიოსანი ადამიანებისთვის საშიში იყოს. და არც ის შეიძლება, რომ ნორმალური პოლიტიკური ლიდერის ხელისუფლებაში დაბრუნებით ადამიანების ერთი ჯგუფი განუწყვეტლივ ცდილობდეს სხვა ჯგუფების დაშინებას (რაც ხშირად ხდება ფეისბუკში).
საშიშია სადისტი, რომელიც ცდილობს, თავისი უძლურებიდან ყოვლისშემძლეობის ილუზია შექმნას და რომელიც ამ ილუზიის შექმნას ადამიანების სიცოცხლეს სწირავს (როგორც ერიხ ფრომი გვასწავლის)“, დაწერა ია ანთაძემ, მოგვიანებით კი სტატუსს მიაწერა:
„ამ პოსტის შთაგონების წყარო გახლავთ ჩემი წინა პოსტის კომენტარები, სადაც ამაყად გვარწმუნებენ, რომ გული გვისკდება მიხეილ სააკაშვილის დაბრუნების შიშით“.
სტატუსს რესპუბლიკელი დავით ზურაბიშვილი გამოეხმაურა:
„მე მაგაში დარწმუნება არ მჭირდება. ალალად მეშინია. თან ამათ რომ ვუყურებ, არ აგვცდება მგონი, ისევ ჩვენ თუ არ ვქენით რამე. ჩვენ-ში ვის ვგულისხმობ, მოგვიანებით დავაზუსტებ“, - დაწერა მან.
