-
2014-02-18 23:39
უკრაინულ მედიაში გავრცელებული ინფორმაციით, ქვეყნის პრეზიდენტმა ვიტალი კლიჩკოს დაურეკა და მოლაპარაკების დაწყება შესთავაზა.
ამის შესახებ სცენიდან განცხადება თავად ვიტალი კლიჩკომ გააკეთა და აღნიშნა, რომ მათი ერთადერთი პირობა „ბერკუტის“ შეჩერება და ძალოვნების გაყვანაა: „მე მზად ვარ ვისაუბროთ, განვიხილოთ სიტუაცია, მაგრამ ხალხის გაწირვა უნდა დასრულდეს“, - განაცხადა კლიჩკომ.
გავრცელებული ინფორმაციით, ევრომაიდნის კომენდანტმა ანდრეი პარუბიმ, რომელიც ინსტიტუტსკაიას ქუჩაზე შეტაკებებში მონაწილეობდა, თავში რამდენიმე დარტყმისგან ინსულტი მიიღო. „თავდაპირველად ჩანდა, რომ მას კონტუზია ჰქონდა მიღებული, მაგრამ ინსულტი დაუდგინდა“, - წერენ აქტივისტები სოციალურ ქსელებში.
რამდენიმე წუთის წინ გავრცელებული ინფორმაციით, პარტია „რეგიონების“ ერთერთმა წარმომადგენელმა ოლეგ ცარევმა რუსეთის ტელევიზიით გამოსვლისას განაცხადა, რომ ევრომაიდანი ერთი საათის განმავლობაში გაწმენდილი იქნება.
ევრომაიდანზე შტურმსა და ინსტიტუტსკაიას ქუჩაზე დღის განმავლობაში განვითარებულ მოვლენებს უკვე მოჰყვა შეფასებები ევროკავშირის ქვეყნებისა და აშშ-ის მხრიდან. აშშ აცხადებს, რომ „განიხილება სხვადასხვა ზომების მიღება“ უკრაინაში მიმდინარე მოვლენებთან დაკავშირებით. ამასთან, უკრაინაში აშშ-ის ყოფილმა ელჩმა სტივენ პაიფერმა განაცხადა, რომ იანუკოვიჩი მოვლენების მშვიდობიანად განვითარების ბოლო შანსებს სპობს.
აღსანიშნავია ასევე, რომ გერმანიის საგარეო საქმეთა სამინისტრომ გაავრცელა განცხადება, სადაც ხაზგასმულია სანქციების გატარების შესაძლებლობა, ხოლო პოლონეთი აცხადებს, რომ „ევრომაიდნის დარბევას სერიოზული გართულებები“ მოჰყვება უკრაინის ხელისუფლებისთვის.