ნინო გიორგობიანი ლევან გვაზავას პასუხობს

LIVE

ნინო გიორგობიანი ლევან გვაზავას პასუხობს

2016-04-16 17:33

სახელმწიფო უსაფრთხოების სამსახურის საზოგადოებასთან ურთიერთობის სამსახურის უფროსი, ნინო გიორგობიანი, ვანო მერაბიშვილის ყოფილი მოადგილის ლევან გვაზავას იმ ინტერვიუს ეხმაურება, რომელიც ,,ქართულ გაზეთში“ გამოქვეყნდა.

ინტერვიუში ლევან გვაზავა ამბობდა, რომ სუს-ის თანამშრომელმა მოიპარა საიდუმლო დოკუმენტაცია და წაიღო რუსეთში. გვაზავა ხელისუფლებას მოუწოდებდა, გაერკვიათ რა სახის ინფორმაცია გადაიტანეს სხვა ქვეყანაში და ხომ არ იყო მათ შორის პპირადი ცხოვრების ამსახველი კადრები. გვაზავა ამბობდა, რომ ამ ფაქტს რეაგირება არ მოჰყოლია.

გვაზავას ამ განცხადებას გიორგობიანი ვრცელი კომენტარით გამოეხმაურა, აღნიშნა, რომ არანაირი საიდუმლო ინფორმაციის გადატანას ადგილი არ ჰქონია: ,,აფხაზეთის ხმა“ მის კომენტარს უცვლელად გთავაზობთ:

,,მინდა გამოვეხმაურო ბატონ ლევან გვაზავას კომენტარს, რომ თითქოს სუს-ის თანამშრომელმა მნიშნველოვანი ინფორმაცია რუსეთში გაიტანა. 1. ეს პიროვნება უკვე დაკავებულია და მას ბრალი აქვს წარდგენილი 4 მუხლით: საქართველოს სსკ-ის 237-ე მე-3 ნაწილის „გ“ ქვეპუნქტით - ცეცხლსასროლი იარაღის და საბრძოლო მასალის მართლსაწინააღმდეგო დაუფლება მისაკუთრების მიზნით, ჩადენილი სამსახურებრივი მდგომარეობის გამოყენებით; 236-ე მუხლის მე-3 ნაწილით - ცეცხლსასროლი იარაღის და საბრძოლო მასალის მართლსაწინააღმდეგო გადაზიდვა; 180-ე მუხლის 1-ლი ნაწილით - თაღლითობა; 333-ე მუხლის 1-ლი ნაწილით - სამსახურებრივი უფლებამოსილების გადამეტება. ის, რომ მან მნიშვნელოვანი მასალები ქვეყნიდან გაიტანა არის დიდი ტყუილი. აღნიშნული პირის დაკავება სწორედ სუს-ის აქტიური მუშაობის შედეგად განხორციელდა და წინასწარ არ მოხდებოდა დაანონსება, თუ როგორ და რა ფორმით ვაპირებდით მის დაკავებას.

2. ეს პირი მუშაობდა ღია წყაროებზე, რომ დაგიკონკრეტოთ, ღია წყაროები ნიშნავს იმ ინფორმაციას, რაც მედიით ყველასთვის არის ხელმისაწვდომი, მას სამსახურებრივად არ ჰქონდა წვდომა საიდუმლო დოკუმენტაციაზე, შესაბამისად ვერ გაიტანდა მნიშვნელოვან ინფორმაციას.

3 - რაც შეეხება იმას, დაისვა თუ არა ამ თემაზე კითხვები, პარლამენტში ბატონი ლევან იზორიას გამოსვლისთვის რომ მოგესმინათ ნახავდით, რომ აღნიშნულ კითხვას ბატონმა ლევანმა უკვე გასცა პასუხი.

რამდენადაც ჩემთვის ცნობილია, ბატონ ლევან გვაზავას აღნიშნული განცხადების გაკეთებამდე ინფორმაციის გადამოწმება სახელმწიფო უსაფრთხოების სამსახურში არც კი უცდია და თუ აქვს მცირედი ინტერესი გაიგოს სიმართლე, ვურჩევდი მას, მომავალში, სანამ მსგავს მნიშვნელოვან საკითხებზე ისაუბრებს, ინფორმაცია გადაამოწმოს იმ უწყებაში, რომელსაც ეს ინფომაცია ეხება.“-წერს გიორგობიანი.