საქართველოს პრეზიდენტი (2004-2013წწ) მიხეილ სააკაშვილი უკრაინული ტელევიზიის „მეხუთე არხის“ პირდაპირ ეთერში ჩაერთო.
მიხეილ სააკაშვილმა სამძიმარი გამოუცხადა ყველა დაღუპულის ახლობლებს:
„მათ შორის, როგორც გავიგე, საქართველოს მოქალაქეცაა, მათაც და ყველა დაღუპულის ოჯახებს მინდა მივუსამძიმრო“, - განაცხადა მიხეილ სააკაშვილმა.
მისი განცხადებით, აბსურდულია უკრაინის ხელისუფლების განცხადება იმის შესახებ, რომ კიევის ცენტრში „ანტიტერორისტული ოპერაცია“ მიმდინარეობს:
„არანაირი ანტიტერორისტული ოპერაცია ეს არ არის, ეს არის ტიანენმენის მოედანზე (მოედანი პეკინში, სადაც 1989 წელს ჩინეთის ხელისუფლებამ სისხლში ჩაახშო დემონსტრაცია, - ლ.ბ.) ჩატარებული სისხლისღვრის განმეორება ევროპის ცენტრში. მე აღფრთოვანებული ვარ უკრაინელი ხალხის გმირობით, ამ ერზე მშვიდობისმოყვარე ერი, ალბათ, არ არსებობს.
ვლადიმირ პუტინს მიაჩნია, რომ იმ თანხად, რა თანხაც ორი მილიარდის სახით მან გადაუხადა იანუკოვიჩს, იყიდა უკრაინის სუვერენიტეტი, იყიდა უკრაინელი ხალხის თავისუფლება, მაგრამ მე მწამს, რომ უკრაინელი ხალხი ამ ბრძოლაში გაიმარჯვებს.
ჟურნალისტის კითხვაზე, ხედავს თუ არა კავშირს რუსეთის მიერ საქართველოს წინააღმდეგ 2008 წელს განხორციელებულ აგრესიასა და დღეს უკრაინაში მიმდინარე მოვლენებს შორის, მიხეილ სააკაშვილმა განაცხადა, რომ სხვათა შორის, სცენარი საქართველოს მიმართ პუტინის აგრესიისა და უკრაინის მიმართ აგრესიას შორის აბსოლუტურად ერთნაირია:
„პუტინი დაჰპირდა 2 მილიარდს უკრაინას მორჩილების სანაცვლოდ, თავის დროზე, 2012 წელს, არჩევნებზე პუტინმა საქართველოსთვისაც გადაიხადა 2 მილიარდი, მაგრამ მე იმედი მაქვს, რომ უკრაინელი ხალხი ბრძენი აღმოჩნდება და პუტინის გეგმა ჩაიფუშება. ამავე დროს, ევროკავშირი უნდა გამოფხიზლდეს და უფრო მკაცრ ქმედებებს უნდა მიმართოს - ეს ძალიან ბევრ ევროპელ პოლიტიკოსს კარგად ესმის“, - აღნიშნა მიხეილ სააკაშვილმა „მეხუთე არხზე“ ჩართვის დროს.
