ოდესის ოლქის გუბერნატორი, საქართველოს მესამე პრეზიდენტი მიხეილ სააკაშვილი უკრაინის პრეზიდენტს უპირისპირდება და აცხადებს, რომ პრობლემა არ იყო მხოლოდ იაცენუკი და პრობლემა, ხშირად, პრეზიდენტის მიდგომებშია. სააკაშვილმა პოროშენკოს ულტიმატუმი წაუყენა.
მიხეილ სააკაშვილმა განცხადება საკუთარ გუნდთან ერთად გააკეთა და განაცხადა, რომ უერთდება კიევის მერის ინიციატივას, სახალხო ნდობით აღჭურვილი მთავრობის შექმნის შესახებ. მან დეპუტატებს მოუწოდა, არ მისცენ ხმა იმ მთავრობას, რომელიც უკვე ცნობილია და რომელიც კორუმპირებული პირებისგან შედგება.
სააკაშვილმა მთელი რიგი ნაბიჯების გადადგმა ულტიმატუმის ტონით, უახლოესი დღეების განმავლობაში მოითხოვა. მოთხოვნებს შორისაა ოდესის ოლქის პროკურორის სტოიანოვის გათავისუფლება თანამდებობიდან, სისხლის სამართლის საქმის აღძვრა ტრუხანოვის მიმართ, რუსული პასპორტის დამალვისა და საარჩევნო კომისიის შეცდომაში შეყვანის გამო.
"მე მგონია, რომ რეფორმატორებს არაფერი უნდა აკავშირებდეს უკრაინის ახლანდელ ხელისუფლებასა და მთავრობასთან. ახლა არაა დრო, ვინმემ ხელი დააფაროს თავის კორუმპირებულ მეგობრებს, ეს უკრაინამ უკვე გაიარა. ან ხელისუფლება კიევში დაიწყებს ცვლილებებს და ამისთვის რამდენიმე დღე ეძლევათ, ან ჩვენ ყველანი შევიკრიბებით და ჩვენ თვითონ შევცვლით იმას, რაც შესაცვლელია".
