,,ახალი პოლიტიკური ცენტრი - გირჩის" ლიდერები და წევრები გუში, ღამის 12 საათზე 9 აპრილის მემორეალთან მივიდნენ და პატივი მიაგეს დაღუპულთა ხსოვნას.
,,9 აპრილი, ერთის მხრივ ტრაგიკული, ხოლო მეორეს მხრივ, უმნიშვნელოვანესი დღეა საქართველოს უახლეს ისტორიაში. აქ, ამ ადგილას, გასული საუკუნის 90იან წლებში წყდებოდა საქართველოს დამოუკიდებლობის ბედი. აქ, ამ ადგილას, ადამიანებმა გასწირეს სიცოცხლე, რათა ჩვენ დღეს გვქონოდა დამოუკიდებლობა" - განაცხადა ზურა ჯაფარიძემ.
მანამდე მან 9 აპრილის პირადი განცდები "ფეისბუქზე" გაიხსენა:
"89 წლის 9 აპრილს, დაახლოებით ამ დროს მამაჩემს ვთხოვე სახლში წავიდეთქო, მთელი დღე ველოსიპედზე ვიკატავე და კუნთები მტკიოდა.
ჩემ ძმას არ უნდოდა წასვლა, მაგრამ ჩემმა დაჟინებამ გაჭრა. ბიძაჩემი დარჩა. შემდეგ მახსოვს დილის 6-ისთვის დედაჩემის კივილი, რუსებმა ხალხი დახოცესო;
7-ისთვის მახსოვს სადარბაზოს კიბეებზე სისხლიანი ბიძაჩემი, ნიჩბებით დაჩეხეს ხალხიო; ხელებზე თითები ჰქონდა გადატყავებული, ქვაფენილის ფილები ავყარეთ და ვესროდითო...
შემდეგ მახსოვს ’ბეტეერი’ მრგვალ ბაღთან, ზედ შემომჯდარი სიგარეტიანი სამხედროებით, ეგეთი მძაფრი ზიზღის გრძნობა მას შემდეგ მხოლოდ 2008-ში მქონდა..." - წერს ზურაბ ჯაფარიძე.