უკრაინის გენპროკურორის პირველი მოადგილე და შეთავსებით, ოდესის ოლქის პროკურორი დავით საყვარელიძე დაკავებული თანამდებობიდან გათავისუფლებულია. ამის შესახებ განცხადება უკრაინის გენერალური პროკურატურის ვებგვერდზე გამოქვეყნდა.
გათავისუფლების მიზეზად რეორგანიზაცია და უკრაინის რადის დეპუტატთა კოლექტიური წერილი სახელდება, რომელიც საყვარელიძის გათავისუფლებას არამარტო დაკავებული თანამდებობიდან, არამედ პროკურატურის ორგანოებიდან მოითხოვს. განცხადებაში აღნიშნულია, რომ გენპროკურატურაში არაერთი წერილი შევიდა საყვარელიძის მიერ ორი თანამდებობის შეუთავსებლობასთან დაკავშირებით.
შეგახსენებთ, უკრაინის რადის რამდენიმე დეპუტატმა დავით საყვარელიძის გადადგომა უკრაინის გენპროკურორ ვიქტორ შოკინის სახელზე გაგზავნილ წერილში 26 მარტს მოითხოვა. საყვარელიძის გადაყენების შესახებ განცხადება რამდენიმე წუთის წინ გენპროკურატურამ პირდაპირ ეთერშიც გაავრცელა.
ამასთან, უკრაინის გენპროკურორის ვიქტორ შოკინის 29 მარტის ბრძანების თანახმად, დავით საყვარელიძეს დაეკისრა დისციპლინარული სასჯელი "პროკურორის ეთიკის დარღვევის გამო".
