2014-02-18 19:57

კიევის ევრომაიდანი და მიმდებარე ტერიტორია ზედხედით, ფართო პლანით. განახლებადი ინფორმაცია კიევიდან. ინფორმაციის გამოქვეყნებისას მითითებულია თბილისის დრო. დააკლიკეთ: ონლაინტრანსლაცია

კიდევ ერთი ზედხედი მოძრავი კამერით: ონლაინტრანსლაცია 2

ინფორმაცია აბზაცში:

20:15

საგარეო საკითხებსა და უსაფრთხოების პოლიტიკაში ევროკავშირის უმაღლესი წარმომადგენელი კეტრინ ეშტონი უკრაინას მოუწოდებს, რადაში დაუბრუნდეს პოლიტიკური საკითხების განხილვას. ეშტონი გმობს ძალადობის გამოვლენას ნებისმიერი მხარის მიერ და აცხადებს, რომ ოპოზიციისა და ხელისუფლების მოლაპარაკებაში უნდა ჩაირთოს ისეთი საკითხები, როგორიცაა კოალიციური მთავრობის შექმნა, კონსტიტუციური რეფორმისთვის მომზადება და გამჭვირვალე საპრეზიდენტო არჩევნების ჩატარება.

20:10

ევრომაიდნის აქტივისტები აქვეყნებენ ფოტოს, სადაც ჩანს, რომ შინაგანი ჯარის წარმომადგენლები, რომლებსაც ინსტიტუტის ქუჩასთან მობილიზება დაევალათ, კალაშნიკოვის სიტემის ავტომატებით არიან შეიარაღებული.

19:58

კიევში ავტომანქანების შესვლაზე შეზღუდვები დაწესდა. შსს-მ გაავრცელა განცხადება, სადაც ნათქვამია, რომ კიევის დროით 18:00 (თბილისის დროით 21:00) საათზე ნებისმიერი უწესრიგობა უკრაინის დედაქალაქში მკაცრად იქნება აღკვეთილი. ამავე დროს, ვრცელდება ინფორმაცია, რომ უკრაინის სხვადასხვა ქალაქებიდან კიევის მიმართულებით უამრავი მოქალაქე მიემგზავრება. ბოლო ინფორმაციით, რადა რამდენიმე დეპუტატმა დატოვა და ევრომაიდანზე გავიდა, სადაც ამ დროისთვის ხალხს უკვე მიმართეს ვიტალი კლიჩკომ, ოლეგ ტიაგნიბოკმა და არსენ იაცენუკმა. ამ უკანასკნელმა განაცხადა, რომ "ბერკუტი" კალაშნიკოვის ავტომატებით იყო შეიარაღებული.

19:50

ამ წუთებში ევრომაიდანზე შეკრებილებს ოპოზიციის ლიდერები მიმართავენ. უკვე გამოვიდა ვიტალი კლიჩკო. ისინი აცხადებენ, რომ იანუკოვიჩთან მოლაპარაკება ვერ შედგა, თუმცა, რადის სპიკერის რიბაკის განცხადებით, უკრაინის პრეზიდენტი მზადაა, ოპოზიციის ლიდერებს 19 თებერვალს შეხვდეს.