საპარლამენტო უმრავლესობის წევრის დავით ლორთქიფანიძის განცხადებით, "ბოზური საქციელი" არასდროს ჩაუდენია და არც ჩაიდენს. ამის შესახებ მან "ახალ ვერსიასთან" საუბარში განაცხადა.
ჟურნალისტის შეკითხვაზე, რატომ აქვს ძველებური ტელეფონი, ლორთქიფანიძე პასუხობს, რომ ტელეფონი მისთვის კომუნიკაციის საშუალებაა, ხოლო მედიის წარმომადგენლის მორიგ რეპლიკაზე - "ჰაი კლასის" ტელეფონით საუბრებს ჩუმად ჩაიწერდითო, დეპუტატი პირდაპირ პასუხობს: "არ მჭირდება. ბოდიში და, ასეთი ბოზური საქციელი ცხოვრებაში არ გამიკეთებია და არც გავაკეთებ".
ამ კონტექსტში ლორთქიფანიძე 2 ოქტომბერს პარლამენტის შენობასთან მომხდარ ინციდენტსაც იხსენებს და ამბობს, რომ პარლამენტარების შეურაცხყოფა თავად ნაციონალებმა გაუტოლეს მძიმე დანაშაულს, ხოლო თვითონ არსად მოუთხოვია, რომ ახალგაზრდებმა, რომლებიც აქციაზე მისი შეურაცხყოფის გამო დააკავეს, პიჯაკი და შარვალი უნდა უყიდონ:
"ისე მოხდა, რომ ადამიანმა მეგაფონი მესროლა და რა უნდა გამეკეთებინა. სისხლის სამართლის კოდექსით, მოწმის სტატუსით, დაზარალებულად ვარ ცნობილი. გამომძიებელმა გამომკითხა რა იყო, არსად მითქვამს, სათვალე და პიჯაკი უნდა მიყიდონ-მეთქი. რაც შეეხება სასჯელს, „ნაცმოძრაობას“ წარმოუდგენლად მიაჩნია, რომ ჩვენ სასამართლოსა და პროკურატურის საქმიანობაში არ ვერევით. თუ გამოძიებასთან ითანამშრომლებენ, ვფიქრობ, ამ ადამიანებს სასჯელი შეუმსუბუქდებათ, რადგან არავის მოსწონს, როცა ადამიანი ციხეშია, მაგრამ ეს ხალხი ციხეში „ნაცმოძრაობის“ გამოა", - აცხადებს დავით ლორთქიფანიძე.