გაზეთ "კომუნისტის" ყოფილი რედაქტორი, 1990 წლის მრავალპარტიულ არჩევნებზე კომუნისტური პარტიის სიით გასული დეპუტატი, 1990-99 წლებში საქართველოს უზენაესი სასამართლოს ყოფილი თავმჯდომარე მინდია უგრეხელიძე ვენეციის კომისიაში გიორგი პაპუაშვილის ნაცვლად წარადგინეს. ინფორმაცია თეა წულუკიანმა დაადასტურა.
მინდია უგრეხელიძე ამჟამად საქართველოს საპატრიარქოს წმინდა ანდრია პირველწოდებულის სახელობის ქართული უნივერსიტეტის სამართლის პროფესორია.
მინდია უგრეხელიძის შვილი, პაპუნა უგრეხელიძე, საჯარო რეესტრის ეროვნული სააგენტოს თავმჯდომარეა. შეგახსენებთ, რომ რუსთავი 2-ის 51%-იანი წილის მფლობელი შპს ტელეკომპანია საქართველოს გაყიდვის შესახებ 29 სექტემბერს გაფორმებული ხელშეკრულება საჯარო რეესტრმა სამართლებრივი ხარვეზების არსებობის მოტივით არ დაარეგისტრირა. შპს საქართველო 1 ოქტომბერს საქალაქო სასამართლოს გადაწყვეტილებით დააყადაღეს.
უგრეხელიძის მეუღლე, ევა გოცირიძე, საქართველოს იუსტიციის უმაღლესი საბჭოს წევრია.
თავად მინდია უგრეხელიძე 1986-88 წლებში იყო საქართველოს ტექნიკური უნივერსიტეტის პრორექტორი, 1983 წელს დაინიშნა საქართველოს კომუნისტური პარტიის ცენტრალური კომიტეტის განყოფილების გამგის მოადგილედ, 1988-1990 წლებში რედაქტორობდა გაზეთ კომუნისტს.
1985-1987 წლებში მინდია უგრეხელიძემ საავტორო მონაწილეობა მიიღო რუსეთის საბჭოთა სოციალისტური ფედერაციული რესპუბლიკის სისხლის სამართლის კოდექსის მოდელის შემუშავებასა და წიგნად გამოცემაში. 1999-2009 წლებში იყო ადამიანის უფლებათა ევროპული სასამართლოს მოსამართლე.
