2015-10-01 19:21

სააგენტო GHN-ის დამფუძნებელი გოჩა მირცხულავა საგანგებო განცხადებას ავრცელებს: "საქართველოს ხელისუფლება, მისი ფაქტობრივი მმართველის, ბიძინა ივანიშვილის მეთაურობით, ქართული მედიის წინააღმდეგ ტოტალურ ლაშქრობას აწყობს. ამ ლაშქრობის ხილული მიზნებია, 2016 წლის არჩვენები და ქართულ საზოგადოებაში რუსული იდეოლოგიის გაძლიერება.

სასამართლოს დღევანდელი გადაწყვეტილება პირდაპირი შეტევაა თავისუფალ სიტყვასა და მედიაზე. სამწუხაროა, რომ სასამართლო ასრულებს, თუნდაც ყველაზე გავლენიანი - ფულით გავლენიანი ადამიანის ნება-სურვილს.

თანადგომას ვუცხადებ ტელეკომპანია „რუსთავი 2-ს“. თანადგომას ვუცხადებ, უპირველესად, იმის გამო, რომ ამჟამად მიმდინარე სასამართლო დავა, არის მედიაზე შეტევა, რომელიც ჯერ კიდევ გასულ წელს დაიგეგმა საქართველოს ყოფილი პრემიერ-მინისტრის, ბიძინა ივანიშვილისა და მისი გარემოცვის მიერ. მე ეს ინფორმაცია მიღებისთანავე  ვაუწყე საზოგადოებას. მაშინ ვთქვი ისიც, რომ დაიწყებოდა მედიაზე ტოტალური შეტევა და მასში მოჰყვებოდა ჟურნალისტი ინგა გრიგოლია, ტელეკომპანია „მაესტრო“, ინტერნეტმედია და პრესა.

„რუსთავი 2“ არ არის რომელიმე ერთი დამფუძნებლის საკუთრება, იმის მიუხედავად, თუ რა წილის მფლობელია ის. „რუსთავი 2“, მოსწონს მისი სარედაციო პოლიტიკა ვინმეს თუ არა,  ეროვნული მაუწყებელია და მისი სტანდარტები სრულად აკმაყოფილებს ტელემაუწყებლის აღიარებულ პრინციპებს.

და აქვე, არ შემიძლია კითხვა არ დავუსვა ქიბარ ხალვაშს, კითხვა სამართლიანობისთვის - 2004 წელს ვისთვის წართმეულ თამბაქოს ყიდდით? რა ხელი ჰქონდა ამ თამბაქოსთან  ბატონ ირაკლი ოქრუაშვილს, რომელიც თქვენი ე.წ. „კრიშა“ იყო? და ასე შემდეგ... უამრავი კითხვის დასმა შეიძლება... არც ერთი არ გახლავთ ბატონო ქიბარ, რიტორიკული კითხვა. თქვენ კეთილსინდისიერი წილის მფლობელი კი არა, უბრალოდ, მედროვე ხართ. სხვადასხვა პოლიტიკურ ვითარებებში, სხვადასხვა გავლენიან პატრონებს შოულობთ და სულ ეს არის თქვენი ბიზნესის „წარმატების „საიდუმლო“.

გოჩა მირცხულავა

თბილისი

1.10.2015