ადვოკატი ირმა ჭკადუა აცხადებს, რომ კადრები, სადაც გადაღებულია მის შვილსა და პატრულს შორის მომხდარი ინციდენტი, რაც ალკოტესტზე მის შემოწმებას მოჰყვა, არასრულყოფილია, რადგან მას ალკოტესტის გამოყენება სამჯერ მოსთხოვეს.
ამასთან, ადვოკატმა "არჩევანში" განაცხადა, რომ ყაზბეგის გამზირიდან პეკინზე გადახვევისა და შემდეგ უკვე ტელევიზიასთან დაღმართამდე საპატრულო პოლიციის ეკიპაჟმა სამჯერ გააჩერა. მისი თქმით, სიტუაცია მთლიანად პატრულის მიერ იყო პროვოცირებული და პატრულს მეტი თმენის ვალდებულება აქვს, "მით უმეტეს, ისეთ სიტუაციაში, როცა ბავშვები ზიან და იცინიან, როცა მე პროცედურებს ვასრულებ".
საქართველოდან უსაფრთხოების უზრუნველყოფის მიზნით გაქცეული პატრულ-პოლიციელის მიერ გავრცელებულ კადრებში ჩანს ირმა ჭკადუას დაახლოებით 20-25 წლამდე ასაკის ვაჟი, რომელიც ალკოტესტით შემოწმების პროცედურას თავდაპირველად მშვიდად ხვდება, შემდეგ კი მანქანიდან გადმოდის და სიტყვიერ შეურაცხყოფას აყენებს პოლიციელს, ამასთან, ამბობს ფრაზას: "ვის ეუბნები, ჩაბერეო, ირმას ეუბნები, ბიჭო?", ხოლო შემდეგ მიმართავს "დედაშენს ჩააბერინე".
