"რეფორმატორები" საგანგებო განცხადებას ავრცელებენ და „რეფორმატორების“ ნაწილის მიერ „აფხაზეთის ხმაზე“ გამოქვეყნებულ განცხადებას პასუხობენ, სადაც აღნიშნული იყო, რომ პარტიის თავმჯდომარე გიორგი ჟამუტაშვილი მიიჩნევს, რომ თავისუფალ სიტყვაზე მსგავსი ზეწოლა, თანაც წინასაარჩევნო პერიოდში, მხოლოდ ტოტალიტარული რეჟიმისთვის დამახასიათებელი რეალობაა.
ამასთან დაკავშირებით „აფხაზეთის ხმას“ დაუკავშირდნენ „რეფორმატორების“ აღმასრულებელი მდივანი და პარტიის თავმჯდომარე ირაკლი ღლონტი, რომელთაც აღნიშნეს, რომ გიორგი ჟამუტაშვილი პარტიის თვითმარქვია თავმჯდომარეა და პარტიის თავმჯდომარის სახელით განცხადების გაკეთების უფლება მხოლოდ ირაკლი ღლონტს აქვს, მოგვიანებით კი "აფხაზეთის ხმამ" "რეფორმატორების" აღმასრულებელი მდივნის ნინო ჩარკვიანის ხელმოწერილი საგანგებო განცხადება მიიღო, რომელსაც ქვემოთ ვაქვეყნებთ, თუმცა, აუცილებლად მიგვაჩნია, მანამდე რამდენიმე საკითხი განვმარტოთ:
„აფხაზეთის ხმა“ განმარტავს, რომ გიორგი ჟამუტაშვილის განცხადება გამოქვეყნდა მას შემდეგ, რაც ამ უკანასკნელმა ის „აფხაზეთის ხმას“ მიაწოდა. ამასთან, არსებობს მედიით გავრცელებული ინფორმაცია ანუ, არსებობს რეალობა, როცა „რეფორმატორების“ ერთი ნაწილი ატარებს ყრილობას და რიცხავს პარტიიდან მის თავმჯდომარეს ირაკლი ღლონტს, ხოლო თავმჯდომარედ აცხადებს გიორგი ჟამუტაშვილს, ხოლო ირაკლი ღლონტი და მისი მომხრეები - „რეფორმატორების“ სხვა ფრთა აცხადებს, რომ არანაირი ყრილობა არ ჩატარებულა და მხოლოდ თვითმარქვიები აქტიურობენ.
„აფხაზეთის ხმა“ ცალსახად გამოხატავს პოზიციას იმასთან დაკავშირებით, რომ „რეფორმატორებში“ დაწყებულ, უკვე სასამართლო სივრცეში გადასულ დაპირისპირებაში არ გამოხატავს არცერთი მხარის პოზიციას, თუმცა, საიტის რესურსს უთმობს როგორც ერთ, ასევე მეორე მხარეს, ხოლო მას შემდეგ, რაც სასამართლო მიიღებს შესაბამის გადაწყვეტილებას, საიტზე და „აფხაზეთის ხმის“ ეთერში „რეფორმატორებთან“ დაკავშირებული ახალი ამბებისა და განცხადებების გამოქვეყნებისას იხელმძღვანელებს ამ გადაწყვეტილების მიხედვით.
აქედან გამომდინარე, უცვლელად გთავაზობთ განცხადებას, რომელიც „აფხაზეთის ხმამ“ პარტიის აღმასრულებელი მდივნისგან ნინო ჩარკვიანისგან მიიღო:
„მსურს გამოვეხმაურო რადიო "აფხაზეთის ხმის" ოფიციალურ ვებ-გვერდზე "რეფორმატორების'' სახელით გავრცელებულ ინფორმაციას და საზოგადოებას ვაუწყოთ, რომ პოლიტიკურ პარტია "რეფორმატორებს" ტელეკომპანია "რუსთავი2"-თან დაკავშირებით დღეს არ გაუვრცელებია არანაირი განცხადება და ადგილი აქვს მოსახლეობის შეცდომაში შეყვანის ფაქტს.
ამის გარდა პარტიის სახელით განცხადებებს ავრცელებს პარტიის ყოფილი წევრი - გიორგი ჟამუტაშვილი, რომელიც პარტიის დებულებისა და მის წინაშე არსებული მიზნების უხეში დარღვევის საფუძველზე ჩვენი პოლიტიკური საბჭოს მიერ გარიცხულ იქნა 2015 წლის 14 იანვარს. გვსურს საზოგადოებას ვაცნობოთ, რომ გიორგი ჟამუტაშვილის მხრიდან ადგილი აქვს ,,რეფორმატორების'' საქმიანი იმიჯისა და კანონიერი საქმიანობის ხელშეშლის ფაქტებს, რის გამოც პარტიას იუსტიციის სამინისტროს საჯარო რეესტრის ეროვნულ სააგენტოსთან ერთად მიმართული აქვს საქართველოს პროკურატურისათვის და მიმდინარეობს გამოძიება.
მიგვაჩნია, რომ გიორგი ჟამუტაშვილის მხრიდან ადგილი აქვს სავარაუდო დანაშაულს, რომელსაც გამოძიების ინტერესებიდან გამომდინარე ამ ეტაპზე არ ვახმაურებთ, თუმცა შედეგებთან დაკავშირებით საზოგადოებას საქმის კურსში აუცილებლად ჩავაყენებთ. მოვუწოდებ ყველა მედია საშუალებას, თავი შეიკავონ მოქალაქე გიორგი ჟამუტაშვილის მიერ პარტიის სახელით გაკეთებული განცხადებების გავრცელებისგან, ვინაიდან ეს არღვევს ჩვენს კონსტიტუციურ საქმიანობას და ზიანი ადგება "რეფორმატორების" პოლიტიკურ ინტერესებს. პარტიის თავმჯდომარე არის ირაკლი ღლონტი, რომლის უფლებამოსილების ვადა განსაზღვრულია 2018 წლამდე და პარტია არ გეგმავს ამ კუთხით ცვლილებებს.
აქვე ავღნიშნავთ და საეჭვოდ მივიჩნევთ აღნიშნული ცრუ ინფორმაციის გავრცელებას სწორედ მას შემდეგ, რაც "რეფორმატორების" ლიდერის მხრიდან დღეს გაკეთდა მწვავე განცხადება, სადაც ირაკლი ღლონტი მკაცრად აკრიტიკებს ნაციონალური მოძრაობის ლიდერებს ჩიორა თაქთაქიშვილს და დავით დარჩიაშვილს".
