2015-07-09 07:23

უკრაინის პრეზიდენტთან გამართულ შეხვედრაზე, სადაც საოლქო ადმინისტრაციის ხელმძღვანელები და ძალოვნები მონაწილეობდნენ, დნეპროპეტროვსკის გუბერნატორმა ვალენტინ რეზნიჩენკომ აღნიშნა, რომ მხოლოდ მიხეილ სააკაშვილი კი არა, სხვა გუბერნატორებიც მუშაობენ.

მან მაგალითად მოიყვანა ხარკოვის გუბერნატორის მაგალითი, რომელმაც გადახდის ელექტრონულ სისტემაზე გადასვლა დაანაონსა, მაგრამ აპლოდისმენტები ვერ მიიღო, მაშინ როცა „სააკაშვილმა თქვა, რაღაც ლამაზ იუსტიციის სახლს ავაშენებთო, ამას აპლოდისმენტები მოჰყვა. ეს, რა თქმა უნდა, ძალიან კარგია. მაგრამ მე მინდა იცოდეთ რომ სხვა დანარჩენებიც მუშაობენ, უბრალოდ, ჩვენ გვაქვს სირთულეები კანონთან მიმართებაში. სამწუხაროდ, ჩვენ, გუბერნატორებს ხშირად არ გვაქვს მსგავსი ქმედებებისთვის უფლებამოსილება. სხვა შემთხვევაში ჩვენთან პროკურორი მოვა...“.

სააკაშვილმა ამის პასუხად განაცხადა, რომ მართალია, კანონმდებლობა არ ითვალისწინებს უკრაინაში იუსტიციის სახლების მშენებლობას, მაგრამ ახალი კანონის მოლოდინში კიდევ წელიწადნახევარი გავა: „რა უკეთესია: რომ უკრაინა სწრაფად განვითარდეს, თუ რომ თქვენთან პროკურორი არ მოვიდეს?“.

რეზნიჩენკომ აღნიშნა, რომ მისთვის მთავარია, ქვეყანა „კანონის შესაბამისად“ ცხოვრობდეს და სააკაშვილს სთხოვა, არ შეეწყვეტინებინა.

ამის შემდეგ შელაპარაკებაში პრეზიდენტი პოროშენკო ჩაერთო, რომელმაც განაცხადა, რომ დღესდღეობით, სამწუხაროდ თუ საბედნიეროდ, მიმდინარეობს კანონმდებლობაში ცვლილებების შეტანის პარალელური პროცესი. მისი თქმით, პრეზიდენტს აქვს საკანონმდებლო ინციატივების უფლება, გუბრენატორები კი პრეზიდენტის ხელისუფლების ვერტიკალია, ამიტომ ის ელოდება მათგან კანონთა ცვლილების პროექტებს, რაც თვითონ გუბერნატორებს გაუხსნის ხელ-ფეხს.

„შესაბამისი კანონმდებლობის არარსებობა არაა საფუძველი, რეფორმების არარსებობა გავამართლოთ“, - განაცხადა პეტრო პოროშენკომ და დაამატა: „თუ ჩვენ დავსხდებით და დაველოდებით, რომ ვინმე კანონმდებლობას შეცვლის, რათა რეფორმები დავიწყოთ, წაგებული დავრჩებით“.