2015-07-08 23:17

ოდესის ოლქის ადმინისტრაციის ხელმძღვანელი მიხეილ სააკაშვილი ოდესის პორტში კორუფციის ფაქტებზე, კონკრეტულ სქემებზე და ამ სქემებში უკრაინის უშიშროების სამსახურის ჩართულობაზე ალაპარაკდა. 

შსს-ში მოძიებული კონკრეტული დოკუმენტაციის მიხედვით ოდესის გუბერნატორმა საოლქო ადმინისტრაციათა ხელმძღვანელების შეხვედრაზე პრეზიდენტ პოროშენკოსთან განაცხადა, რომ ოდესის პორტში კორუფციულ სქემებში სწორედ უშიშროების სამსახურის ის დანაყოფები მონაწილეობაენ, რომლებსაც კორუფციასთან ბრძოლა ევალებათ.

"აქ მე კონკრეტული დოკუმენტები მაქვს, ისინი კვალს ტოვებენ", - განაცხადა სააკაშვილმა ტრიბუნიდან, რის შემდეგაც მას დოკუმენტების გადაცემა პრეზიდენტმა სთხოვა. თავის მხრივ, პეტრო პოროშენკომ დოკუმენტაცია პროკურატურას გადასცა და მოკვლევის დასაწყებად და საქმის აღძვრისთვის ორი დღის ვადა მისცა.  

აღსანიშნავია, რომ მიხეილ სააკაშვილმა მკაცრად ისაუბრა იმის შესახებაც, რომ ხშირ შემთხვევაში, მოსამართლეები ლმობიერად ექცევიან ჩინოვნიკებსა და სამართალდამცველებს, რომლებიც კორუფციის ფაქტებზე არიან დაკავებული. ამის საპასუხოდ პეტრო პოროშენკომ რადას მიმართა წინადადებით, აკრძალოს კორუფციაში მხილებული ჩინოვნიკებისა და სამართალდამცველების გათავისუფლება გირაოს საფუძველზე.