-
2015-05-25 03:45
ინდიანას შტატის უნივერსიტეტის პროფესორი დოდონა კიზირია 26 მაისის აღნიშვნასთან დაკავშირებით სოციალურ ქსელში გაჩენილ აზრთა სხვადასხვაობას ეხმიანება.
"ღმერთო რა დღეში ვართ! ფუი ამ მთავრობას! რა გვეშველება! ეს რა დღეში ჩაგვაგდეს! ბევრი მსგავსი შეძახილებით და მთავრობისა თუ სხვა ოდიოზური პიროვნებების ლანძღვით სავსეა ფბ.
ერთ რამეს გეტყვით, მეგობრებო, რაც თქვენც კარგად იცით - არაფერი არ გვეშველება, თუ თავს არ ვუშველით. ძალიან მერიდება ამის თქმა, ვინაიდან ფიზიკურად არა ვარ საქართველოში და არ შემიძლია პირადად მივიღო მონაწილეობა ამ საქმეში. მაგრამ არც ის შემიძლია არ ვთქვა, როგორი დაღონებული ვარ იმით, თუ რა მცირე რაოდენობის ადამიანები აქტიურობენ და თანაც თითქმის ყოველთვის ერთიდაიგივე სახეები. ჩემი უღმესი პატივისცემა მათ საქმიანობას!
აი, თუნდაც რეაქცია 26 მაისთან დაკავშირებით. ძალიან ბევრმა განაცხადა, რომ არ წავა აქციაზე, რადგან არ სურს გვერდზე დაუდგეს ირაკლი წერეთელს. არ მესმის, რა შუაშია ირაკლი წერეთელი! განა მის გარდა სხვას არ მოუვიდოდა აზრად ამ დღის აღნიშვნა?! ეს დღე, საქართველოს დამოუკიდებლობის დღე, ირაკლი წერეთელის მოგონილია?
როგორც ადრე დავწერე, კარგი იქნებოდა, ეს აქცია ოფიციალურად დაანონსებულიყო, მაგრამ რახან ეს არ მოხდა, არ ნიშნავს, იმას, რომ არ უნდა ჩატარდეს, მხოლოდ ისეთ დროს და ადგილას, სადაც არ მოხდება პოლიციასთან შეტაკება, რაც მხოლოდ მთავრობის წისქვილზე დაასხავს წყალს.
ვიღაცამ გამოთქვა აზრი, რუსთაველზე გავიდეთ, როცა მთავრობის მიერ მოწყობილი ცირკი დამთავრდებაო. არ ვიცი, ეს რამდენად შესაძლებელი იქნება. მაგრამ სხვა ბევრი ადგილიცაა, სადაც შეიძლება აქციის ჩატარება. არა უსათუოდ და მხოლოდ თბილისში, არამედ ყველგან, ყველა ქალაქში, ყველა რაიონში. ფბ-ზე ლანძღვა არაფერს გვიშველის.
თუ ამით შემოვიფარგლეთ, მაშინ ივანაშვილს, დღევანდელი საქართველოს მფლობელ-გამგებელს ყოველთვის ექნება მიზეზი თავდაჯერებით სთქვას, როგორც არაერთხელ უთქვამს, ხალხი დიდი ნდობა მაქვსო." - წერს "ფეისბუქში", საკუთარ გვერდზე დოდონა კიზირია.