პოპულარულმა YahooSport–მა, რუბრიკაში „სოჭის ფარდებს მიღმა“ რეპორტაჟი მიუძღვნა აფხაზეთს, როგორც "დაფარულ ქვეყანას", რომელსაც „აქვს საკუთარი პასპორტი, დროშა გერბი და ჰიმნი“.
ჟურნალისტი აღნიშნავს, რომ აფხაზეთი ქვეყანაა, „რომელიც საქართველოს შემადგენლობაში ითვლება“, თუმცა, ამ აღნიშვნის მიუხედავად, სიუჟეტში საუბარია ცალკე ქვეყანაზე და არა საქართველოს ოკუპირებულ რეგიონზე.
ჟურნალისტი მარტინ როჯერსი ასევე, აღნიშნავს, რომ „ექვსი ქვეყნისგან შემდგარმა ბლოკმა, რომელსაც რუსეთი ხელმძღვანელობს და მასში ნიკარაგუა და ვენესუელა შედის, აფხაზეთი სრულფასოვან სახელმწიფოდ აღიარეს“.
ჟურნალისტი იხსენებს ზაფხულში, „აფხაზეთის დამოუკიდებლობის დღზე“ მათ სტუმრობას სოხუმში და აცხადებს, რომ მაშინდელთან შედარებით ახლა საზღვრის გადაკვეთა ბევრად უფრო გართულებულია.
YahooSport–ის მიერ მომზადებულ სიუჟეტს საპარლამენტო უმცირესობის წევრი მარიამ საჯაია ეხმიანება და იმაში, რომ ამ შედეგამდე მივიდა საქმე, საქართველოს მთავრობას ადანასაულებს:
„თქვენმა გამუდმებულმა და დაჟინებულმა მცდელობამ შედეგი გამოიღო, გილოცავთ, პუტინი გახარებულია!“, – ამბობს მარიამ საჯაია და კიდევ ერთხელ მოუწოდებს საქართველოს დელეგაციას, ხმამაღალი განცხადებით დატოვონ ოლიმპიადა:
„YahooSport“ რეპორტაჟს უძღვნის აფხაზეთის რესპუბლიკას. ეს პირველ რიგში არის საქართველოს სუვერენიტეტის, დამოუკიდებლობისა და ტერიტორიული მთლიანობის უპატივცემლობა, რაც არის თქვენს მიერ თავის დამცირების შედეგი. მიყევით პუტინის გეგმას და აღმოჩნდეით სოჭში "აფხაზეთის რესპუბლიკის ოფიციალური დელეგაციის" გვერდით - ამით აფხაზეთის დამოუკიდებლობის აღიარებას შეუწყობთ ხელს.
ამ ნიუსით Yahoo-ს ძალიან ბევრი მომხმარებელი გაიცნობს აფხაზეთს, როგორც დამოუკიდებელ ქვეყანას, თქვენ კი მათი დელეგაციის გვერდზე ყოფნით დამატებით ლეგიტიმაციას მისცემთ ამ პროცესს. გამოფხიზლდით, სანამ დროა!
დატოვეთ ოლიმპიადა ხმამაღალი განცხადებით და პროტესტით რუსული, მზაკვრული გეგმის წინააღმდეგ!“, – ამბობს საპარლამენტო უმცირესობის წევრი.
YahooSport–ზე მომზადებულ სიუჟეტთან დაკავშირებით ოფიციალური კომენტარი არ გაუკეთებიათ ხელისუფლების წარმომადგენლებს.
