2015-04-22 01:42

21 აპრილს საქართველოს მესამე პრეზიდენტი, უკრაინის პრეზიდენტის მრჩეველი მიხეილ სააკაშვილი დონბასში, ანტიტერორისტული ოპერაციის ზონაში იმყოფებოდა.

როგორც უკრაინული „მეხუთე არხი“ იტყობინება, ის ქართველ მოხალისე მებრძოლებს შეხვდა. ტვ-ს არ დაუკონკრეტებია, სახელდობრ სად იმყოფებოდა მიხეილ სააკაშვილი, თუმცა, სევეროდონეცკის საქალაქო საბჭოს დეპუტატმა ალექსი მალევანეცმა „ფეისბუქზე“ დაწერა, რომ სააკაშვილი ლუგანსკის ოლქში, სევეროდონეცკში იმყოფებოდა.

მანამ, სანამ ლუგანსკი ბოევიკების ხელშია, სევეროდონეცკი ლუგანსკის ოლქის დროებით ადმინისტრაციულ ცენტრად ითვლება. სწორედ იქაა განთავსებული ლუგანსკის საოლქო სამხედრო-სამოქალაქო ადმინისტრაცია.

„ჩვენ კარგად გვესმის, რომ იმ შემთხვევაში, თუ უკრაინა ვერ გაძლებს ამ სასტიკ პირობებში, არ იარსებებს არც საქართველოს, არც მოლდოვის, არც ყოფილი სსრ კავშირის სხვა ქვეყნების მომავალი. ახლა, როგორც არასდროს, საჭიროა გამარჯვების მოპოვება“, - განაცხადა მიხეილ სააკაშვილმა.