-
2015-04-17 23:49
დღევანდელ სასამართლო სხდომაზე თბილისის ყოფილმა მერმა გიგი უგულავამ განაცხადა, რომ ის უნდობლობას უცხადებს სასამართლოს და პროცესზე მხოლოდ პოლიტიკური განცხადებების გასაკეთებლად გამოცხადდება.
ამასთან, გიგი უგულავა მისი პატიმრობის ვადის ხელახალი ათვლის დაწყებას საკონსტიტუციო სასამართლოში გაასაჩივრებს.
უგულავას თქმით, სასამართლოები და მოსამართლე ვერ მოიპოვებენ პატივისცემას, რადგან „ეს უწყება ივანიშვილის ჩმორი გახდა და კონსტიტუციაზე დავლურს ცეკვავთ“. მისივე თქმით, გიგი უგულავა, ვანო მერაბიშვილი და სხვა დაკავებულები პოლიტიკური პატიმრები არიან და მათი გათავისუფლებაც პოლიტიკური საკითხია.
„ნიშნავს თუ არა კონსტიტუციის მე-18 მუხლის მე-6 თავი იმას, რომ ადამიანის წინასწარი პატიმრობა არ შეიძლება გაგრძელდეს 9 თვეზე მეტხანს, თუკი მის მიმართ არ არსებობს გამამტყუნებელი განაჩენი? ამ კითხვაზე პასუხი უნდა გასცეს საკონსტიტუციო სასამართლომ.
არანაირი ემოციური ფონი არ მაქვს, ძალიან მშვიდად ვარ, მიდევს უამრავი წიგნი და ვკითხულობ... ემოციური ფონი თქვენ უნდა გქონდეთ, კონსტიტუციაზე დავლურს რომ ცეკვავათ“, - მიმართა გიგი უგულავამ მოსამართლეს.
სასამართლო სხდომაზე ერთი კომიკური სიტუაციაც შეიქმნა: როცა მოსამართლე გერმანე დადეშქელიანმა ბრალდებულ გიგი უგულავას, წესისამებრ, სახელისა და გვარის დასახელება მოსთხოვა, გიგი უგულავამ უპასუხა:
„ბატონო მოსამართლევ, თქვენ ჩემი სახელიც იცით, გვარიც და ვფიქრობ, ერთი-ორჯერ ხმაც გექნებათ მოცემული“.