ირაკლი ალასანიას განცხადებით, დუბაიში ვიზიტთან დაკავშირებით ბიძინა ივანიშვილის განცხადებების მთავარი სამიზნე ოჯახში უნდობლობის შეტანა იყო, -
ამის შესახებ ალასანიამ ტელეკომპანია "რუსთავი 2"-ის გადაცემა ,,ნანუკას შოუში" ისაუბრა.
მისი თქმით, ბიძინა ივანიშვილის აღნიშნული განცხადება წაიკითხა, შემდეგ კი ჩანაწერი აჩვენეს. ალასანია ამბობს,რომ ამასთან დაკავშირებით ბიძინა ივანიშვილთან ერთი-ერთზე საუბარი ჰქონდა და მომხდარს თავის სახელი დაარქვა.
,,მეორე თუ მესამე დღეს თავდაცვის სამინისტროში მოვიდა რაღაცის სანახავად. ერთი-ერთზე რომ დავრჩით, ვუთხარი, ამის შესახებ გვქონდა საუბარი. ამას დავარქვი თავის სახელი. ჭორაობა კი არა, უფრო რთული სახელი დავარქვი, რასაც კაცი კაცს ეტყვის ამ შემთხვევაში. რა თქმა უნდა, მან როგორც ჩვევია, გადაიტანა ისრები სხვა პიროვნებაზე, ის ბოღმა ადამიანია და ალბათ იმან გააკეთაო. იმ დროს მე საერთოდ დავკარგე ამ ადამიანის მიმართ ურთიერთობის სურვილი და პატარა ნდობაც და ურთიერთობის პატარა ძაფი, ბოლო თუკი იყო დარჩენილი ისიც ჩაიჭრა. მე ამ ადამიანთან ურთიერთობა მაშინ დავამთავრე, პოლიტიკური ურთიერთობა გავაგრძელე", - აღნიშნა ირაკლი ალასანიამ.
საქართველოს ყოფილმა პრემიერ-მინისტრმა ბიძინა ივანიშვილმა ირაკლი ალასანიას დუბაიში ვიზიტი "პატარა შეცდომად" შეაფასა. ამის შესახებ ივანიშვილმა 2013 წლის თებერვალში გამართულ პრესკონფერენციაზე ისაუბრა.
