საქართველოს პრემიერმინისტრის სპეციალური წარმომადგენელი რუსეთთან ურთიერთობების საკითხებში, ზურაბ აბაშიძე სოჭის ოლიმპიადასთან დაკავშირებით კომენტარს აკეთებს.
ჟურნალისტებთან შეხვედრისას დღეს აბაშიძემ გავრცელებულ ინფორმაციაზე ისაუბრა, ოლიმპიადაზე ე.წ. „სამხრეთ ოსეთის“ დე ფაქტო პრეზიდენტის ლეონიდ თიბილოვის ოფიციალური სტუმრის სტატუსით მიწვევასთან დაკავშირებით:
„6 თებერვალს სოჭში მიემგზავრება საქართველოს გუნდი, ოლიმპიურ თამაშებში მონაწილეობის მისაღებად, ეს იყო საკმაოდ რთული გადაწყვეტილება, რადგან სოჭის ოლიმპიადა ტარდება საქართველო-რუსეთის საზღვართან, ოკუპირებულ აფხაზეთთან ახლოს.
როდესაც ჩვენ ამ გადაწყვეტილებას ვიღებდით, ვხელმძღვანელობდით რამდენიმე მნიშვნელოვანი მოსაზრებით, პირველი არის კეთილი ნების ნაბიჯი გადადგმული საერთაშორისო თანამეგობრობისა და ოლიმპიური მოძრაობის მიმართ, ასევე ჩვენ გვსურს გავმიჯნოთ სპორტი და პოლიტიკა, ჩვენ ასევე რუსეთის მხარეს შევთავაზეთ თანამშრომლობა უსაფრთხოების სფეროში ოლიმპიურ თამაშებთან დაკავშირებით, ეს საერთაშორისო ვალდებულებაც არის, კერძოდ ტერორიზმის წინააღმდეგ ბრძოლა.
ჩვენ ასევე ძალიან დიდ მნიშვნელობას ვანიჭებთ იმ გარემოებას, რომ სოჭის ოლიმპიადაში მონაწილეობისთვის მოწვეულნი არიან მხოლოდ იმ ქვეყნების წარმომადგენლები რომლებიც საერთაშორისო ოლიმპიური კომიტეტის წევრები არიან.
გუშინ გავრცელდა ინფორმაცია იმის შესახებ, რომ სამხრეთ ოსეთის დეფაქტო ხელმძღვანელი სოჭის ოლიმპიადაზე ოფიციალურად არის მიწვეული. სამწუხაროდ, არალეგიტიმური რეჟიმის პრესსამსახურის სრულიად უცნობი ხელმძღვანელის ეს განცხადება სწრაფად აიტაცა ჩვენმა პოლიტიკური სპექტრის ერთმა ჯგუფმა და გააკეთეს გაუაზრებელი, ძალიან ნაჩქარევი განცხადებები.
ჩვენ, რა თქმა უნდა გადავამოწმეთ ეს ინფორმაცია, რუსეთის საგარეო საქმეთა სამინისტრომ, კიდევ ერთხელ დაგვიდასტურა, რომ სოჭში მიწვეულნი არიან ოფიციალურად მხოლოდ იმ ქვეყნების წარმომადგენლები, რომლებიც მონაწილეობენ ოლიმპიურ თამაშებში, კერძო პირებს ნებისმიერს შეუძლია სოჭში ჩასვლა.
საერთაშორისო ოლიმპიური კომიტეტის ეს დადასტურება ძალიან მნიშვნელოვანია და თუნდაც ამიტომ, აბსოლუტურად სწორია ჩვენი გადაწყვეტილება ოლიმპიადაში მონაწილეობის შესახებ“, - განაცხადა ზურაბ აბაშიძემ.
