2015-03-07 23:08

დეპუტატი გოგა ხაჩიძე „ფეისბუქის“ პირად გვერდზე იმ უხერხულ სიტუაციას აღწერს, რომელშიც ისტორიულ ძეგლზე ასული მცირეწლოვან ვაჟთან ერთად ჩავარდა.

„ბებერი უძახე შენ...

დღეს კარგი ამინდი იყო და გადავწყვიტე, 7 წლის ლუკა მცხეთაში გამესეირნებინა.

ჰოდა ჩავედით მცხეთაში და დავიწყე:

ეს სვეტიცხოველია ლუკა, ის - ჯვარი, აქ პომპეუსის ხიდია, იქ არაგვი უერთდება მტკვარს, ეს სამთავროს ველია, ის მონასტერი და ა.შ.

ის რა არის? - მეკითხება ლუკა.

- ის ბებრისციხეა.

- შეიძლება ავიდეთ?

- კარგი, ავიდეთ - ვპასუხობ მე და ცოტა ხანში ბებრისციხეში შემავალ აღმართს მივუყვებით...

მივდივართ და ვუყვები ისტორიებს ციხესიმაგრეებზე, მათ ფუნქციაზე, რისთვის იყენებდნენ, როდის, როგორ...

აღმართი ავათავეთ, კარიბჭე გავიარეთ, შევედით ციხის მთავარ სივრცეში და რას ვხედავთ, აქეთ-იქით ქვებზე მიმჯდარა 4 წყვილი და ცხრა პირ ტყავს იძრობენ ზასაობაში.

დავიბენი...

ერთიანად უკან გამობრუნება ცოტა უხერხულად მომეჩვენა, ამიტომ ლუკას სასწრაფოდ ჩავკიდე ხელი და მარჯვნივ გავიწიე, იქ სადაც ციხის სხვა სივრცე მეგულებოდა.

ფართხა-ფურთხით გადავირბინეთ ციხის ჩამოშლილი ქვები (წინ მე მივდიოდი) და თავი გავყავი ციხის კედლის მიღმა.

ვხედავ სხვა წყვილი პირდაპირ ბალახზე გაწოლილა და სექსითაა დაკავებული.

ელდანაკრავი შემოვბრუნდი, ბავშვი ხელში ავიტაცე და მოგონილი - „უი, უი, ახლა გამახსენდა, ძალიან გვეჩქარება-თი“ გამოვბუნძულდი ბებრისციხიდან.

რა ხდება, რაშია საქმე?...

ისტორიულ ძეგლებზე, წინაპართა ძვლების ყივილის ფონზე ზასაობა (და არა მხოლოდ) რამე ახალი ტრენდია, თუ მე გამოვტოვე რამე?...

...

p.s.

- მამა, რატომ ჰქვია ამ ციხეს ბებრისციხე?

- არ ვიცი ლუკა, წარმოდგენა აღარ მაქვს, რატომ ჰქვია ამას ბებრისციხე.

წყარო: ფეისბუქი