2015-02-28 11:09

რუსული სააგენტოების ცნობით, მოსკოვის ცენტრში რუსი ოპოზიციონერის, ბორის ნემცოვის მკვლელობას 23 წლის უკრაინელი მოდელი, ანნა დურიტსკაია შეესწრო.

უკრაინელი მოდელის თქმით, მან და ნემცოვმა სავაჭრო ცენტრ „გუმში“ ივახშმეს და  დაახლოებით 23 საათისთვის და ვასილევსკის დაღმართისკენ სასეირნოდ გაემართნენ, სადაც მკვლელობა მოხდა.

რუსული მედიის ინფორმაციით, რუსი ოპოზიციონერი მკვლელობამდე ორი საათით ადრე რადიო „ეხო მასკვის“ ეთერში იყო მიწვეული, სადაც 1 მარტს დაგეგმილი ანტიკრიზისული აქციის „გაზაფხულის“ შესახებ ისაუბრა.

პოლიტიკოსის მკვლელობის საქმეზე პოლიცია თეთრი ფერის „Ford Focus“-ის ან „Ford Mondeo“-ს მარკის ავტომანქანას ეძებს.

ტრაგედიის ადგილზე დღეს დილიდან მოქალაქეებს ყვავილები მიაქვთ.

ნემცოვის ოჯახის ადვოკატის ინფორმაციით, პოლიტიკოსს სოციალურ ქსელში მოკვლით ემუქრებოდნენ, რის გამოც სამართალდამცავ ორგანოებში  განცხადებაც შეიტანეს, თუმცა ამას არანაირი რეაგირება არ მოჰყოლია.

რუსი პოლიტიკოსის მკვლელობის გამო 1 მარტისთვის დაგეგმილი ანტიკრიზისული აქცია „გაზაფხული“ გააუქმეს.  

„ტრაგიკული მოვლენების გამო, ანტიკრიზისული მარში, რომელიც ხვალ დილით ქალაქის ცენტრში უნდა გამართულიყო, გავაუქმეთ.

ხვალ უფრო მართებული იქნება, თუ ჩვენ ბორისს პატივს მივაგებთ", - განაცხადა ოპოზიციონერმა პოლიტიკოსმა, მიხეილ კასიანოვმა.