თბილისში შსს–მ დააკავა 22 წლის თენგიზ გ., რომელმაც აღიარა, რომ 24 იანვარს ნუცუბიძის პლატოს მე–3 მიკრორაიონში, ჯგუფური ჩხუბის დროს სამი ახალგაზრდა დაჭრა, რომელთაგან ერთი – 16 წლის მიშო ტყემალაძე გარდაიცვალა.
დაკავებულმა შემთხვევა დეტალურად გაიხსენა და აღიარა, რომ ცივი იარაღით 1997 წელს დაბადებული მიხეილ ჟ. მუცლის არეში, 1997 წელს დაბადებულ ნიკოლოზ კ. მარჯვენა ბარძაყში და 1997 წელს დაბადებული მიხეილ ტ. გულმკერდის არეში დაჭრა და შემთხვევის ადგილიდან მიიმალა.
დაჭრილები ნ. ყიფშიძის სახ. ცენტრალური საუნივერსიტეტო კლინიკის „ემერჯენსი“-ს განყოფილებაში გადაიყვანეს. სწორედ იქ მიყვანისთანავე გარდაიცვალა მიშო ტყემალაძე, ხოლო ორი დაჭრილი ამ დრომდე მკურნალობს და მათი მდგომარეობა დამაკმაყოფილებელია.
შეგახსენებთ, რომ 24 იანვარს, ნუცუბიძის პლატოზე, მესამე მიკრორაიონში, 171–ე საჯარო სკოლის მიმდებარე ტერიტორიაზე მომხდარი ჯგუფური გარჩევის დროს, რაც ჩხუბში გადაიზარდა, ახალგაზრდებმა დანები და ე.წ. შტირები გამოიყენეს.
ფოტოზე: 16 წლის, ჩხუბის შედეგად დაღუპული მიშო ტყემალაძე
