საქართველოს საგარეო საქმეთა სამინისტროს განცხადებით, სპეციალურად ზამთრის XXII ოლიმპიური თამაშების პერიოდისთვის (2014 წლის 7-23 თებერვალი) ქ. სოჭში მივლენილია რუსეთის ფედერაციაში შვეიცარიის კონფედერაციის საელჩოს საქართველოს ინტერესების სექციის ვიცე-კონსული.
მის უშუალო კომპეტენციაში შედის შესაბამისი დახმარება აღმოუჩინოს სოჭში მყოფ საქართველოს მოქალაქეებს.
ასევე, სოჭში ოლიმპიური პარკის ტერიტორიაზე განლაგებულ "შვეიცარიის სახლში" საქართველოს მოქალაქეებისთვის იმოქმედებს "ცხელი ხაზი" +7 926 422 96 49, +7 926 326 45 25.
საქართველოს მოქალაქეებისთვის ცხელი ხაზი ასევე იმუშავებს მოსკოვში მოქმედი შვეიცარიის კონფედერაციის საელჩოს საქართველოს ინტერესთა სექციაში +7 926 926 27 40 და თბილისში, საქართველოს საგარეო საქმეთა სამინისტროს საკონსულო დეპარტამენტში +995 32 294 50 50, +995 577 98 40 20.
რაც შეეხება საქართველოს დელეგაციის წევრთა სოჭში გამგზავრების საკითხს და დელეგაციის შემადგენლობას:
საქართველოს დელეგაცია სოჭის ოლიმპიადაზე ორ ჯგუფად გაემგზავრება. დელეგაციაში სულ 19 ადამიანი შედის. სპორტსმენები და ძირითადი ნაწილი სოჭში 6 თებერვალს გაემგზავრებიან, 4 თებერვალს კი ვიცე-პრეზიდენტი მამუკა ხაბარელი და ოლიმპიური კომიტეტის გენერალური მდივანი ემზარ ზენაიშვილი ჩავლენ.
სოჭის ოლიმპიადაზე სულ ოთხი ქართველი სპორტსმენი მიიღებს მონაწილეობას: მოთხილამურეები ნინო წიკლაური, იასონ აბრამიშვილი, ალექსი ბენიაიძე და მოციგურავე ელენე გედევანიშვილი, რომელიც სოჭში 14 თებერვალს კანადიდან ჩავა. საქართველოს ნაკრების მედროშე ოლიმპიადის გახსნაზე ნინო წიკლაური იქნება.
